सोलापूर प्रतिनिधी
आमदार गोपीचंद पडळकर यांचे निष्ठावंत कार्यकर्ते शरणु हांडे यांचे अगदी फिल्मी स्टाईलने अपहरण झाल्याच्या घटनेने सोलापूर जिल्हा हादरला आहे. कोयते, हॉकी स्टिक आणि तलवारींच्या धाकावर सात जणांच्या टोळीने पाय बांधून, गाडीत कोंबून हांडे यांना उचलून नेले. या घटनेमागे जुने राजकीय वैमनस्य असल्याचे पोलिस तपासात स्पष्ट झाले आहे.
शरणु हांडे सध्या रुग्णालयात उपचार घेत आहेत. टीव्ही ९ मराठीशी बोलताना त्यांनी जीवघेणा प्रसंग सांगितला –
“मी पानटपरी जवळ उभा होतो. अचानक गाडी थांबली. सात जण उतरले आणि थेट माझ्यावर हल्ला चढवला. मारहाण करून गाडीत कोंबलं. पाय घट्ट बांधले. गाडीतून जातानाही ते मला सतत मारत होते. त्यांच्या हातात धारदार शस्त्रं होती. मला कुठे नेत आहेत, काहीच कळत नव्हतं,” असे त्यांनी सांगितले.
घटनेचा उगम काही दिवसांपूर्वीच्या वादात आहे. आरोपी अमित सुरवसेने काही महिन्यांपूर्वी पडळकरांच्या गाडीवर दगडफेक केली होती. त्याचा बदला म्हणून शरणु हांडे यांनी सुरवसेला मारहाण केली. त्याचा व्हिडिओ सोशल मीडियावर व्हायरल झाला. अपमानाचा राग धरूनच सुरवसे आणि त्याच्या टोळीने अपहरणाचा कट रचला.
घटनेची माहिती मिळताच पोलिसांनी चार पथके तयार करून कर्नाटकच्या दिशेने नाकाबंदी केली. रात्री १० वाजता होर्टी गावाजवळ आरोपींची गाडी अडवून सातही जणांना अटक करण्यात आली. गाडीतून शरणु हांडे गंभीर जखमी अवस्थेत सापडले. तात्काळ सोलापूरला उपचारासाठी आणल्याने त्यांचे प्राण वाचले.
एमआयडीसी पोलीस ठाण्यात हत्येच्या उद्देशाने अपहरणाचा गुन्हा नोंदवला असून, या प्रकरणामुळे सोलापूरच्या राजकीय वर्तुळात प्रचंड खळबळ उडाली आहे.
