मुंबई-प्रतिनिधी
मुंबई : शहरातील भटक्या कुत्र्यांचा उपद्रव रोखण्यासाठी त्यांचे निर्बीजीकरण करण्यात येते. त्याचप्रमाणे मांजरींचा वाढता उपद्रव कमी करण्यासाठी पालिकेकडून त्यांचेही निर्बीजीकरण करण्याचे काम सुरू आहे. या वर्षी ऑक्टोबर महिन्यापर्यंत पालिकेकडून ११ हजार ४१० भटक्या मांजरीचे निर्बीजीकरण करण्यात आले आहे.
मुंबईत भटकी कुत्री मांजरांची वाढती संख्या नियंत्रित करण्यासाठी महानगरपालिका प्रशासनाने निर्बीजीकरण मोहीम हाती घेतली आहे. मात्र, ही प्रक्रिया आता वेगाने राबवली जाणार आहे. या मोहिमे अंतर्गत आतापर्यंत पालिकेने १८ हजार ८०८ मांजरांचे निर्बीजीकरण केले आहे. तर या चालू वर्षात तब्बल ११ हजार मांजरांचे निर्बीजीकरण करण्याचे लक्ष्य होते. हे उद्दिष्ट ४६ टक्के पूर्ण झाले असून उर्वरित उद्दिष्ट मार्च २०२५ पर्यंत पालिकेकडून पूर्ण केले जाणार आहे.
भटक्या प्राण्यांची वाढत्या संख्ये बाबत अनेक तक्रारी पालिकेला मिळाल्या होत्या. २०१८ पासून यात आणखी वाढ झाली. मुंबईतील बहुतांश ठिकाणी मांजरांचा वावर वाढला आहे. या सोबतच अनेक प्राणिप्रेमींनीही पालिकेला मांजरांच्या निर्बीजीकरण करण्याची मागणी केली होती. मांजरांच्या संख्येवर विपरीत होऊ नये यासाठी फक्त ७० टक्के निर्बीजीकरण करण्यास मान्यता दिली आहे. ही निर्बीजीकरण मोहीम वेल्फेअर ऑफ स्ट्रे डॉग, बीएसपीसीए, मुंबई व्हेटर्नरी कॉलेज, अहिंसा, इन डिफेन्स ऑफ अनिमल्स, उत्कर्ष ग्लोबल फाऊंडेशन व जीव रक्षा अॅनिमल वेल्फेअर ट्रस्टतर्फे राबवली जात आहे.
