मुंबई प्रतिनिधी
मुंबईसारख्या महानगरीत रोज हजारो स्वप्नं उमलतात… काही क्षणातच हरवतात, तर काही जिद्दीने स्वतःचा मार्ग तयार करतात. रायगड जिल्ह्यातील सोनखार (ता. पेण) या छोट्याशा गावातून आलेली अमिषा पाटील ही त्यापैकीच एक! इंटिरियर डिझाईनच्या दुनियेत स्वतःची वेगळी ओळख निर्माण करण्याचं स्वप्न पाहणाऱ्या या तरुणीने आपल्या कारकिर्दीची सुरुवातच भव्य अशा प्रदर्शनाने केली आणि मुंबईकरांनी तिला अक्षरशः उचलून धरलं.
उत्साह, कला आणि रंगांची जादू
रचना संसद, प्रभादेवी येथून इंटिरियर डिझाईनमध्ये पदवी मिळवलेली अमिषा, अभ्यासकाळातच हॅण्डमेड आर्ट आणि डेकोरेटिव्ह डिझाईन्सकडे ओढली गेली. या आवडीला व्यवसायात रूपांतर देण्याचा तिचा निर्णय म्हणजे तिच्या आयुष्यातील टर्निंग पॉईंट ठरला. १ ते ३ ऑगस्टदरम्यान दादरच्या शिवाजी पार्कजवळील स्काऊट अँड गाईड हॉलमध्ये भरवलेलं हे ‘हॅण्डमेड आर्ट व इंटिरियर डिझाईन एक्झिबिशन’ तिच्या स्वप्नांना रंग देणारं ठरलं.
पहिल्याच दिवशी, सकाळपासूनच नागरिकांचा ओघ लागला. महिला, तरुण-तरुणी, गृहसजावटीची आवड असलेले रसिक—सर्वांनी प्रदर्शनाचा मनसोक्त आस्वाद घेतला. रंगीबेरंगी पेंटिंग्ज, सुंदर वॉल-आर्ट, अनोख्या हॅण्डमेड डेकोरेशन पीसेस आणि क्रिएटिव्ह इंटिरियर डिझाईन मॉकअप्सनी हॉल भरून गेला होता.
“मुंबईला अशा कलाकारांची गरज आहे!”
प्रदर्शन पाहणाऱ्यांनी कलाकृतीतील बारकावे, रंगसंगती आणि परिपूर्ण फिनिशिंगची विशेष दखल घेतली. एका महिला पर्यटकांनी कौतुकाने म्हटलं, “मुंबईला अशा नव्या कलाकारांची नितांत गरज आहे. ही कला फक्त सौंदर्यापुरती मर्यादित नाही, तर ती घर आणि मन दोन्ही सजवते.”
कुटुंबाचा खंबीर आधार
या यशामागे केवळ अमिषाची मेहनतच नाही, तर तिच्या कुटुंबीयांचं न थांबणारं पाठबळही आहे. वडील जीवन पाटील हे बृहन्मुंबई महानगरपालिकेचे सेवानिवृत्त जल अभियंता. त्यांचा शिस्तप्रिय आणि प्रेरणादायी स्वभाव अमिषाच्या प्रत्येक कृतीत झळकतो. आईसह संपूर्ण कुटुंबाने प्रत्येक टप्प्यावर मार्गदर्शन आणि प्रोत्साहन देत तिला या प्रवासात खंबीर साथ दिली.
तरुणांसाठी प्रेरणादायी प्रवास
लहानशा गावातून महानगरीत येऊन, स्वप्नांना रंग देणं आणि त्या रंगांनी जगालाही मोहित करणं—ही गोष्ट तितकीच आव्हानात्मक जितकी सुंदर. अमिषाने हे आव्हान केवळ स्वीकारलं नाही, तर पहिल्याच प्रयत्नात यशाची शिखरं गाठण्याची क्षमता दाखवून दिली.
पुढचं पाऊल…
या यशानंतर अमिषा आता स्वतःच्या डिझाईन स्टुडिओच्या माध्यमातून अधिक प्रकल्प हाताळण्याची तयारी करत आहे. “माझ्या कलाकृती घराघरात पोहोचाव्यात, लोकांच्या दैनंदिन आयुष्यात रंग आणि आनंद आणावेत, हीच माझी इच्छा आहे,” असं ती हसत सांगते.
अमिषा पाटील यांचा हा कलाप्रवास इतर तरुणाईसाठी प्रेरणादायी ठरावा, तिच्या कलेला देश-विदेशातही संधी मिळावी, हीच कला रसिकांची मनःपूर्वक इच्छा.
