सातारा प्रतिनिधी
दिल्ली आणि मुंबई येथील दोन तरुणींना साताऱ्यात आणून त्यांना वेश्या व्यवसाय करण्यास प्रवृत्त केल्याच्या आरोपावरून सातारा शहर पोलिस ठाण्यात एका संशयिताविरुद्ध मानवी अनैतिक व्यापार (प्रतिबंध) कायद्यान्वये गुन्हा दाखल करण्यात आला आहे. पोलिसांनी संबंधित दोन्ही तरुणींची सुटका केली असून, या प्रकरणाचा अधिक तपास सुरू आहे.
संकेत सुरेश चाफेकर (रा. शिवथर, ता. सातारा) असे गुन्हा दाखल झालेल्या संशयिताचे नाव आहे. याप्रकरणी पोलिसांनी फिर्याद दिली आहे.
पोलिसांनी दिलेल्या माहितीनुसार, सोमवारी सातारा शहरातील एका हॉटेलमध्ये हा प्रकार उघडकीस आला. संशयिताने दिल्ली आणि मुंबई येथील दोन तरुणींना हॉटेलमध्ये आणले. त्यांना ग्राहकांसमोर वेश्यागमनासाठी प्रवृत्त करण्यात आले, तसेच त्यातून मिळणाऱ्या पैशांवर स्वतःच्या उपजीविकेसाठी अवलंबून राहून संबंधित तरुणींना अनैतिक व्यवसाय करण्यास प्रोत्साहन दिल्याचा आरोप पोलिसांनी केला आहे.
या प्रकरणाची माहिती मिळाल्यानंतर पोलिसांनी कारवाई करत दोन्ही तरुणींची सुटका केली. त्यापैकी एक तरुणी २६ वर्षांची असून ती दिल्ली येथील रहिवासी आहे. ती शिक्षण घेत असल्याची माहिती पोलिसांनी दिली. दुसरी तरुणी मुंबई येथील असल्याचे पोलिसांनी सांगितले.
संशयिताने संबंधित तरुणींना नेमक्या कोणत्या कारणासाठी साताऱ्यात आणले होते, त्यांच्याशी आर्थिक व्यवहार कसा केला जात होता, या प्रकारात आणखी कोणी सहभागी आहे का, तसेच या प्रकरणामागे मोठे रॅकेट आहे का, या सर्व बाबींचा तपास पोलिसांकडून केला जात आहे.
दरम्यान, हॉटेलमध्ये अशा प्रकारे तरुणींना आणून त्यांना अनैतिक व्यवसायास प्रवृत्त केल्याच्या आरोपामुळे परिसरात खळबळ उडाली आहे. पोलिसांनी प्रकरणाची गांभीर्याने दखल घेत संशयिताविरुद्ध मानवी अनैतिक व्यापार प्रतिबंधक कायद्यानुसार कारवाई केली आहे.
या प्रकरणाचा पुढील तपास सातारा शहर पोलिस ठाण्याचे पोलिस निरीक्षक सचिन म्हेत्रे यांच्या मार्गदर्शनाखाली सुरू आहे. तपासादरम्यान आणखी काही धक्कादायक माहिती समोर येते का, याकडे लक्ष लागले आहे.
