पुणे प्रतिनिधी
अन्न सुरक्षेच्या नियमांचे उल्लंघन करणाऱ्या आणि ग्राहकांच्या आरोग्याशी थेट खेळ करणाऱ्या व्यावसायिकांविरोधात अन्न व औषध प्रशासनाने (FDA) पुणे विभागात मोठी धडक कारवाई केली आहे. ‘सेफ फूड, सेफ ईट, सेफ महाराष्ट्र’ या विशेष अभियानांतर्गत पुणे, सातारा, सांगली, कोल्हापूर आणि परिसरातील हॉटेल्स, रेस्टॉरंट्स, डेअरी व बेकऱ्यांची अचानक तपासणी करण्यात आली. या तपासणीत गंभीर त्रुटी आढळल्याने तब्बल २१ आस्थापनांचे अन्न व्यवसाय परवाने तात्काळ निलंबित करण्यात आले आहेत.
FDA च्या या कारवाईमुळे संपूर्ण हॉटेल आणि खाद्यव्यवसाय क्षेत्रात मोठी खळबळ उडाली असून, नियमांचे पालन न करणाऱ्यांना प्रशासनाकडून स्पष्ट इशारा देण्यात आला आहे.
तपासणीत धक्कादायक वास्तव उघड
अन्न सुरक्षा व मानके कायदा, २००६ अंतर्गत करण्यात आलेल्या तपासणीदरम्यान अनेक आस्थापनांमध्ये अत्यंत अस्वच्छ वातावरणात अन्न तयार होत असल्याचे निदर्शनास आले. काही ठिकाणी स्वयंपाकघरात घाण साचलेली होती, अन्नपदार्थांचे योग्य तापमानात साठवण केली जात नव्हती, कालबाह्य साहित्याचा वापर, कर्मचाऱ्यांकडून स्वच्छतेच्या नियमांचे पालन न करणे, तसेच परवान्यांच्या अटींचे उल्लंघन झाल्याचे आढळले.
या सर्व बाबी ग्राहकांच्या आरोग्यास गंभीर धोका निर्माण करणाऱ्या असल्याने प्रशासनाने कोणतीही दिरंगाई न करता संबंधित आस्थापनांचे परवाने तात्काळ निलंबित केले.
पुणे जिल्ह्यातील प्रमुख आस्थापनांवर कारवाई
पुणे शहर व परिसरातील न्यू सम्राट हॉटेल, हॉटेल केसर (लोणावळा), इंटीग्रेटेड फूड सर्व्हिसेस (बालेवाडी), क्रिमलाईट कन्फेक्शनर्स (लोहगाव व विमाननगर), हॉटेल ताजमहाल (प्रभात रोड), संस्कृती फुड्स (कोरडेवाडी, जुन्नर), स्वीकार्स ई अँड टी प्रा. लि., माधव डेअरी (मंगळवार पेठ), मदिना फॅमिली रेस्टॉरंट (भवानी पेठ) तसेच शिव डेअरी अँड इंडियन बेकरी यांच्यावर परवाना निलंबनाची कारवाई करण्यात आली.
सातारा, सांगली आणि कोल्हापूरमध्येही धडक
ही मोहीम केवळ पुण्यापुरती मर्यादित न राहता सातारा, सांगली आणि कोल्हापूर जिल्ह्यांतही राबविण्यात आली.
सांगली जिल्ह्यातील शिरढोण येथील हॉटेल लक्ष्मी गार्डन फॅमिली रेस्टॉरंट, ईश्वरपूर येथील मे. मेरी कॉर्नर रेस्टॉरंट, तसेच कवठे महांकाळ येथील हॉटेल १२२० यांच्यावर कारवाई करण्यात आली.
कोल्हापूर विभागात शिरोली येथील श्रीकृष्ण बेकरी, इचलकरंजीतील आयेशा बेकरी, कराडमधील बंगलोर अय्यंगार बेकरी, विक्रमनगर येथील डायमंड बेकरी आणि रंकाळा परिसरातील केदारलिंग बेकरी यांच्या परवान्यांवरही निलंबनाची कारवाई करण्यात आली.
ग्राहकांच्या आरोग्याशी तडजोड नाही
अन्न व औषध प्रशासन, पुणे विभागाचे सहआयुक्त दि. वा. भोसले यांनी सांगितले की, ग्राहकांना सुरक्षित व दर्जेदार अन्न मिळणे ही प्रशासनाची सर्वोच्च प्राथमिकता आहे. अन्न सुरक्षेच्या नियमांकडे दुर्लक्ष करणाऱ्या कोणत्याही आस्थापनाला यापुढेही माफी दिली जाणार नाही.
त्यांनी सर्व खाद्यव्यवसायिकांना स्वच्छता, अन्न साठवणूक, उत्पादन प्रक्रिया आणि परवान्यांच्या अटींचे काटेकोर पालन करण्याचे आवाहन केले. नियमांचे उल्लंघन करणाऱ्यांविरोधात भविष्यातही अशीच कठोर कारवाई सुरू राहील, असा स्पष्ट इशाराही त्यांनी दिला.
धडक मोहीम कायम राहणार
FDA ने सुरू केलेल्या या विशेष मोहिमेमुळे राज्यभरातील हॉटेल्स, रेस्टॉरंट्स आणि बेकऱ्यांमध्ये स्वच्छता आणि अन्न सुरक्षेबाबत अधिक सतर्कता बाळगण्याची गरज अधोरेखित झाली आहे. ग्राहकांच्या आरोग्याशी कोणतीही तडजोड सहन केली जाणार नसल्याचा स्पष्ट संदेश या कारवाईतून प्रशासनाने दिला आहे.
