भुवनेश्वर:
ओडिशामध्ये भ्रष्टाचाराविरोधातील सर्वात मोठ्या कारवायांपैकी एक मानल्या जात असलेल्या धाडीत सरकारी अभियंत्याच्या मालमत्तेचा चकित करणारा खुलासा झाला आहे. कंदामाल जिल्ह्यातील बालिगुडा येथील एकात्मिक आदिवासी विकास संस्था (ITDA) चे सहाय्यक कार्यकारी अभियंता बैकुंठनाथ बेहेरा यांच्या मालमत्तेवर ओडिशा व्हिजिलन्स विभागाने टाकलेल्या छाप्यांमध्ये तब्बल २ कोटी रुपयांची रोकड, पाच आलिशान इमारती आणि अनेक मौल्यवान भूखंडांचा शोध लागला आहे. या कारवाईमुळे राज्यातील प्रशासकीय वर्तुळात मोठी खळबळ उडाली असून बेहेरा यांच्या संपत्तीचा आकडा आणखी वाढण्याची शक्यता व्यक्त केली जात आहे.
#WATCH | Odisha: Odisha Vigilance is conducting simultaneous searches at multiple locations following allegations that Baikuntha Nath Behera, Assistant Executive Engineer at ITDA, Baliguda, possesses assets disproportionate to his known sources of income. During the ongoing… pic.twitter.com/v6zFdEKbvw
— ANI (@ANI) June 6, 2026
एकाच वेळी नऊ ठिकाणी धाड
उत्पन्नाच्या ज्ञात स्रोतांपेक्षा कित्येक पटींनी अधिक मालमत्ता जमा केल्याच्या तक्रारीनंतर ओडिशा व्हिजिलन्स विभागाने तपास सुरू केला होता. प्राथमिक चौकशीत संशय बळावल्यानंतर भुवनेश्वर येथील विशेष व्हिजिलन्स न्यायालयाने शोध वॉरंट जारी केले. त्यानुसार शनिवारी सकाळपासून भुवनेश्वर, बालासोर, जाजपूर आणि बालिगुडा येथील बेहेरा व त्यांच्या कुटुंबीयांशी संबंधित नऊ ठिकाणांवर एकाच वेळी छापे टाकण्यात आले.
या कारवाईसाठी अतिरिक्त पोलीस अधीक्षक, उपअधीक्षक, निरीक्षक आणि तांत्रिक अधिकाऱ्यांचे विशेष पथक तैनात करण्यात आले होते. दिवसभर चाललेल्या तपासात बेहेरा यांच्या मालमत्तेचे धक्कादायक तपशील समोर आले.
बँक लॉकर उघडताच अधिकाऱ्यांनाही धक्का
तपासादरम्यान सर्वाधिक चर्चेचा विषय ठरला तो कुटुंबीयांच्या नावावरील बँक लॉकर. लॉकर उघडल्यानंतर त्यामध्ये तब्बल २ कोटी रुपयांची रोख रक्कम आढळून आली. इतक्या मोठ्या प्रमाणावर रोख रक्कम पाहून तपास अधिकारीही चक्रावल्याचे सांगितले जाते.
यापूर्वी बेहेरा यांच्या निवासस्थानी झालेल्या झडतीत सुमारे २.६६ लाख रुपयांची रोकड जप्त करण्यात आली होती. मात्र लॉकरमधील रकमेने संपूर्ण तपासाला नवे वळण दिले आहे.
पाच बहुमजली इमारतींचा शोध
व्हिजिलन्स विभागाने दिलेल्या माहितीनुसार, बेहेरा आणि त्यांच्या कुटुंबीयांच्या मालकीच्या पाच बहुमजली इमारती आढळून आल्या आहेत. त्यामध्ये भुवनेश्वरमधील निलाद्री विहार परिसरातील सुमारे १०,५०० चौरस फूट क्षेत्रफळावर उभारलेली चार मजली भव्य इमारत विशेष लक्षवेधी ठरली आहे.
याशिवाय भुवनेश्वर आणि जाजपूर परिसरातील इतर चार निवासी मालमत्तांचाही तपास अधिकाऱ्यांनी शोध लावला आहे. या सर्व मालमत्तांचे बाजारमूल्य कोट्यवधी रुपयांमध्ये असल्याचा अंदाज व्यक्त केला जात आहे.
राजधानीतच सात प्राइम प्लॉट्स
मालमत्तेच्या तपासात बेहेरा यांच्या नावावर किंवा कुटुंबीयांच्या नावे असलेल्या १३ भूखंडांची माहितीही समोर आली आहे. यापैकी सात प्लॉट्स भुवनेश्वर शहरातील अत्यंत मोक्याच्या आणि महागड्या भागांत असल्याचे तपासात उघड झाले आहे. उर्वरित भूखंड जाजपूर आणि बारीपाडा परिसरात असल्याचे सांगण्यात आले.
जमिनींचे सध्याचे बाजारमूल्य निश्चित करण्यासाठी महसूल आणि तांत्रिक विभागातील तज्ज्ञांची मदत घेतली जात असून अंतिम आकडा सध्याच्या अंदाजापेक्षा अधिक असू शकतो.
६ हजारांच्या पगारावर नोकरीची सुरुवात
या प्रकरणातील सर्वात चर्चेचा मुद्दा म्हणजे बेहेरा यांचा सेवाप्रवास. अधिकृत नोंदीनुसार त्यांनी १९९९ मध्ये केवळ ६ हजार रुपये मासिक वेतनावर कनिष्ठ अभियंता म्हणून शासकीय सेवेत प्रवेश केला होता.
गेल्या सुमारे २५ वर्षांत त्यांनी विविध आदिवासी विकास संस्था आणि अभियांत्रिकी विभागांमध्ये काम केले. यावर्षीच त्यांना पदोन्नती मिळून सहाय्यक कार्यकारी अभियंता पदावर नियुक्ती मिळाली होती. मात्र त्यांच्या सेवाकाळात जमा झालेल्या प्रचंड मालमत्तेने अनेक प्रश्न निर्माण केले आहेत.
सोने, शेअर्स आणि गुंतवणुकींची तपासणी सुरू
रोख रक्कम आणि स्थावर मालमत्तेशिवाय तपास पथकाला सोन्याचे दागिने, बँक ठेवी, पोस्टातील बचत योजना, शेअर बाजारातील गुंतवणूक आणि इतर आर्थिक साधनांची माहिती मिळाली आहे. या सर्व मालमत्तेचे मूल्यांकन अद्याप सुरू असून त्याचा तपशील अंतिम अहवालात समोर येणार आहे.
अधिकाऱ्यांच्या मते, जप्त मालमत्तेचे संपूर्ण मूल्यमापन पूर्ण झाल्यानंतर बेहेरा यांच्या कथित अवैध संपत्तीचा आकडा आणखी मोठा असण्याची शक्यता नाकारता येत नाही.
भ्रष्टाचाराविरोधातील मोठा संदेश
ओडिशा व्हिजिलन्स विभागाने या कारवाईला राज्यातील यंदाच्या वर्षातील सर्वात मोठ्या भ्रष्टाचारविरोधी मोहिमांपैकी एक मानले आहे. सरकारी सेवेत असताना मिळालेल्या उत्पन्नाच्या तुलनेत बेहेरा यांनी जमा केलेल्या संपत्तीचा स्रोत शोधण्यासाठी आता आर्थिक व्यवहार, बँक खाते, गुंतवणूक आणि मालमत्तेची सखोल चौकशी केली जाणार आहे.
या धाडीनंतर सरकारी यंत्रणांमधील भ्रष्टाचाराचा मुद्दा पुन्हा एकदा ऐरणीवर आला असून, बेहेरा यांच्याविरोधातील तपासातून आणखी धक्कादायक खुलासे होण्याची शक्यता व्यक्त केली जात आहे.
