सोलापूर प्रतिनिधी
सोलापूर जिल्ह्यातील मंगळवेढा तालुक्यात सोशल मीडियावर प्रचंड लोकप्रिय असलेल्या आणि ‘हॉटेल ग्रामपंचायत’ या नावाने ओळखल्या जाणाऱ्या प्रसिद्ध रिलस्टार रोहिणी निलेश पाराध्ये यांच्या आकस्मिक मृत्यूने संपूर्ण परिसरात मोठी खळबळ उडाली आहे. अवघ्या २५ वर्षांच्या रोहिणी यांचा मृतदेह त्यांच्या हॉटेलच्या स्वयंपाकघरात गळफास घेतलेल्या अवस्थेत आढळून आल्याने चाहत्यांना आणि स्थानिक नागरिकांना मोठा धक्का बसला आहे.
या प्रकरणात पोलिसांनी आकस्मिक मृत्यूची नोंद केली असून, प्राथमिक तपासात कौटुंबिक वाद आणि मानसिक तणाव या कारणांमुळे त्यांनी टोकाचे पाऊल उचलले असावे, असा अंदाज व्यक्त करण्यात येत आहे. मात्र, त्यांच्या मृत्यूमागील नेमके कारण अद्याप स्पष्ट झालेले नसून पोलीस सर्व बाजूंनी तपास करत आहेत.
सोशल मीडियातून मिळवली वेगळी ओळख
रोहिणी पाराध्ये यांनी काही वर्षांपूर्वी निलेश पाराध्ये यांच्यासोबत प्रेमविवाह केला होता. विवाहानंतर हे दाम्पत्य पुण्यात वास्तव्यास होते. याच काळात रोहिणी यांनी सोशल मीडियावर रिल्स बनवण्यास सुरुवात केली. दैनंदिन आयुष्य, सामाजिक विषय, ग्रामीण खाद्यसंस्कृती आणि विनोदी शैलीतील व्हिडीओंमुळे त्यांना मोठी लोकप्रियता मिळाली.
अल्पावधीतच रोहिणी आणि निलेश पाराध्ये हे सोशल मीडियावरील लोकप्रिय रिलस्टार जोडी म्हणून ओळखले जाऊ लागले. त्यांच्या व्हिडीओंना लाखो व्ह्यूज मिळू लागले आणि त्यांची सोशल मीडियावर मोठी फॅनफॉलोइंग तयार झाली.
सोशल मीडियातून उभा राहिला कोट्यवधींचा व्यवसाय
सोशल मीडियावर मिळालेल्या प्रसिद्धीचा फायदा घेत पाराध्ये दाम्पत्याने मंगळवेढा तालुक्यातील ब्रह्मपुरी येथे रत्नागिरी-नागपूर राष्ट्रीय महामार्गालगत ‘हॉटेल ग्रामपंचायत’ सुरू केले. ग्रामीण चवीचे जेवण, पारंपरिक पदार्थ आणि सोशल मीडियावरील प्रसिद्धी यामुळे हे हॉटेल अल्पावधीतच खवैय्यांचे आकर्षण ठरले.
दूरदूरहून ग्राहक या हॉटेलमध्ये येऊ लागले. व्यवसाय झपाट्याने वाढत गेला आणि पाराध्ये दाम्पत्य नवीन शाखा सुरू करण्याच्या तयारीत होते. व्यवसाय यशाच्या उंचीवर पोहोचत असतानाच ही दुर्दैवी घटना घडल्याने सर्वत्र हळहळ व्यक्त होत आहे.
स्वयंपाकघरात गळफास घेतल्याची माहिती
मंगळवारी दुपारच्या सुमारास रोहिणी पाराध्ये यांनी हॉटेलच्या स्वयंपाकघरातील लोखंडी अँग्लला दोरीच्या साहाय्याने गळफास घेतल्याची माहिती समोर आली. कर्मचाऱ्यांच्या लक्षात हा प्रकार आल्यानंतर त्यांना तातडीने खाली उतरवण्यात आले. मात्र, तोपर्यंत त्यांचा मृत्यू झाला होता.
घटनेची माहिती मिळताच मंगळवेढा पोलिसांनी घटनास्थळी धाव घेत पंचनामा केला. त्यानंतर मृतदेह शवविच्छेदनासाठी पाठवण्यात आला.
कौटुंबिक वादातून नैराश्य?
पोलिसांच्या प्राथमिक तपासात हॉटेल व्यवसायाचा वाढता व्याप, नवीन शाखांच्या नियोजनातून निर्माण झालेला ताण आणि कौटुंबिक मतभेद या कारणांमुळे रोहिणी मानसिक तणावात असल्याचे समोर येत आहे. रागाच्या भरात आणि नैराश्यातून त्यांनी हे पाऊल उचलले असावे, अशी शक्यता तपास यंत्रणांकडून व्यक्त करण्यात येत आहे.
रोहिणी यांचे पती निलेश पाराध्ये यांनी मंगळवेढा पोलीस ठाण्यात फिर्याद दिली असून, पोलिसांनी सध्या आकस्मिक मृत्यू म्हणून नोंद केली आहे. मात्र, या प्रकरणामागे अन्य काही कारण आहे का, याचाही तपास सुरू असल्याची माहिती पोलिस सूत्रांनी दिली.
चाहत्यांकडून हळहळ व्यक्त
रोहिणी पाराध्ये यांच्या निधनाची बातमी समोर आल्यानंतर सोशल मीडियावर शोक व्यक्त केला जात आहे. अनेक चाहत्यांनी त्यांच्या जुन्या व्हिडीओंना श्रद्धांजली वाहत “हसतमुख चेहऱ्यामागे इतका संघर्ष दडलेला असेल, याची कल्पनाही नव्हती,” अशा भावना व्यक्त केल्या.
यश, प्रसिद्धी आणि आर्थिक स्थैर्य मिळाल्यानंतरही मानसिक तणावामुळे एका तरुणीला जीवन संपवावे लागल्याने सोशल मीडिया विश्वासह संपूर्ण मंगळवेढा तालुका हादरला आहे.
