मुंबई प्रतिनिधी
मुंबई महापालिकेचे सहाय्यक आयुक्त महेश पाटील यांच्यावरील आर्थिक गैरव्यवहाराच्या आरोपांना नवे वळण मिळाले असून, केवळ सक्तीची रजा पुरेशी नसून पाटील यांच्यावर थेट फौजदारी गुन्हा दाखल करावा, अशी मागणी मुंबई काँग्रेसने केली आहे.
काँग्रेसचे मुख्य प्रवक्ते सचिन सावंत यांनी “एका सहाय्यक आयुक्ताचा पगार किती? आणि त्यांच्याकडे अचानक करोडो रुपये आले कुठून?” असा रोखठोक सवाल उपस्थित करत महापालिका प्रशासनावरही निशाणा साधला.
एका व्यावसायिकाने पाटील यांच्यावर पुनर्विकास प्रकल्पात गुंतवणूक करून स्वस्त दरात घरे मिळवून देण्याचे आमिष दाखवण्यात आल्याचा आरोप केला आहे. तब्बल ८० कोटी रुपयांचा घोटाळा झाल्याचा दावा या व्यावसायिकाने केला असून, गुंतवणूक मागवण्यासाठी ‘बड्या लोकां’वर दबाव टाकल्याचेही आरोप आहेत.
दरम्यान, आरोपांनंतर पालिका आयुक्त भूषण गगराणी यांनी पाटील यांना एका महिन्याच्या सक्तीच्या रजेवर पाठवले. मात्र “ही कारवाई दिखाऊ असून, प्रकरणाची चौकशी आर्थिक गुन्हे शाखेकडे (EOW) सुपूर्द करावी,” अशी मागणी सावंत यांनी केली.
प्रकरण नेमके काय?
भांडूपच्या ‘एस’ विभागाचे सहाय्यक आयुक्त महेश पाटील यांनी वांद्रे येथील एका पुनर्विकास प्रकल्पात गुंतवणूक केल्यास स्वस्त दरात घरे मिळतील, अशी ऑफर देत अनेकांकडून मोठ्या प्रमाणात रक्कम जमा केल्याचा आरोप आहे. निशित पटेल नावाच्या व्यावसायिकाने मुख्यमंत्री देवेंद्र फडणवीस आणि पोलिसांकडे तक्रार दाखल केली असून, पाटील यांनी या निधीचा अपहार केल्याचा त्यांचा दावा आहे.
पटेल यांनी पाटील यांच्यावर भाडोत्री गुंडांच्या मदतीने त्यांना मारहाण आणि धमकी दिल्याचाही गंभीर आरोप केला आहे.
पाटील यांचे स्पष्टीकरण
महेश पाटील यांनी सर्व आरोप फेटाळत “खोटे, निराधार आणि दिशाभूल करणारे आरोप केले जात आहेत,” असे म्हटले आहे.
या प्रकरणामुळे महापालिकेच्या कारभारावर पुन्हा एकदा प्रश्नचिन्ह उभे राहिले असून, काँग्रेसने ‘महापालिका भ्रष्टाचाराचा अड्डा झाला आहे’ असा आरोप करत कठोर कारवाईची मागणी पुन्हा अधोरेखित केली आहे.
