अयोध्या:
अयोध्येतील प्रभु श्रीरामांच्या मंदिरावर पुन्हा एकदा कोट्यवधींचा वर्षाव झाला असून, कोणत्या दानशूरांनी सर्वाधिक देणगी दिली याबाबतची चर्चा नव्याने रंगू लागली आहे. भगवान राम आणि माता सीता यांच्या विवाह पंचमीच्या अभिजित मुहूर्तावर पंतप्रधान नरेंद्र मोदी यांनी आज मंदिराच्या शिखरावर भगवा ध्वज फडकावला आणि पुन्हा एकदा रामभक्तीचा महापूर उसळला. २२ फूट उंच व ११ फूट रुंद अशा पवित्र निशाण्याच्या ध्वजारोहणानंतर देणगीदारांचे योगदानही चर्चेत आले.
सर्वोच्च न्यायालयाच्या ऐतिहासिक निर्णयानंतर २२ जानेवारी २०२४ रोजी प्राणप्रतिष्ठेचा सोहळा पार पडल्यानंतरच देश-विदेशातील रामभक्तांनी मुक्तहस्ताने देणग्यांचा ओघ सुरू केला. श्रीराम जन्मभूमी तीर्थ क्षेत्र ट्रस्टच्या माहितीनुसार, या मोहिमेत सर्वाधिक देणगी अध्यात्मिक गुरू मोरारी बापूंनी दिली आहे. त्यांनी स्वतः ११.३ कोटी रुपये अर्पण केले तर अमेरिका, कॅनडा आणि ब्रिटनमधील त्यांच्या अनुयायांनी केलेल्या ८ कोटींच्या देणगीतून त्यांचे एकूण योगदान तब्बल १८.६ कोटी रुपये इतके झाले आहे.
दानकर्त्यांच्या या यादीत सुरतच्या दानवंत उद्योजकांचेही वर्चस्व दिसून येते. प्रख्यात हिरे व्यापारी दिलीप कुमार व्ही. लक्ष्मी व त्यांच्या कुटुंबीयांनी मंदिरासाठी तब्बल १०१ किलो सोने अर्पण केले. बाजारमूल्याने या सोन्याची किंमत ६८ कोटी रुपयांहून अधिक आहे. मंदिराचे दरवाजे, गर्भगृह आणि विविध अलंकारांची सजावट याच सोन्याने करण्यात आली असून, हे योगदान सर्वाधिक संस्मरणीय ठरले आहे.
याशिवाय उद्योगजगतानेही रामलल्लाच्या सेवेत हातभार लावला आहे. मुकेश अंबानी यांनी मंदिर ट्रस्टला २.५१ कोटी रुपये दान केले, तर गुजरातचे दानशूर गोविंदभाई ढोकलिया, तसेच सुरतचे उद्योजक गोविंदभाई धोकलिया यांनी प्रत्येकी ११ कोटी रुपये अर्पण केले.
ग्रीन लॅब डायमंड कंपनीचे मुकेश पटेल यांनी ११ कोटी रुपये किमतीचा हिऱ्याचा मुकुट रामलल्लाच्या सेवेसाठी समर्पित केला. तर दानशूर महेश कबुतरवाला यांनी ५ कोटी रुपये देऊन सहभाग नोंदवला.
बिहारमधील प्रसिद्ध महावीर मंदिर न्यास यांनीही १० कोटी रुपये देणगी देत या पुण्यकार्याला हातभार लावला. २०२२ मध्ये निधीसंकलन मोहीम सुरू झाल्यापासून सामान्य भक्तांपासून उद्योगपतींपर्यंत सर्वच स्तरातून जबरदस्त प्रतिसाद मिळाला. पहिल्याच दिवशी तब्बल ३ कोटी रुपये जमा झाले, तर आजवर ५,५०० कोटी रुपयांपेक्षा अधिक निधी राममंदिराच्या निर्मितीसाठी संकलित झाल्याची माहिती ट्रस्टकडून देण्यात आली.
रामभक्तांच्या या उदंड प्रेमामुळे केवळ आर्थिक योगदानच नव्हे, तर श्रद्धेचा आणि भावनेचा सुवासिक सागरच अयोध्येत पुन्हा एकदा दाटून आला आहे. राम मंदिर भारताचे आध्यात्मिक केंद्र बनत असताना, या देणग्या प्रत्येक रामभक्ताच्या भक्तीचा आणि समर्पणाचा एक सामूहिक दर्पण ठरत आहेत.
