मुंबई प्रतिनिधी
शिवसेना (उद्धव बाळासाहेब ठाकरे) पक्षाचे खासदार आणि प्रवक्ते संजय राऊत तब्येतीच्या कारणास्तव पुढील दोन महिन्यांसाठी सार्वजनिक आयुष्यापासून दूर राहणार आहेत. प्रकृतीत अचानक बिघाड झाल्यानंतर डॉक्टरांच्या सल्ल्याने त्यांनी सर्व राजकीय आणि सामाजिक कार्यक्रमांपासून तात्पुरती विश्रांती घेण्याचा निर्णय जाहीर केला.
— Sanjay Raut (@rautsanjay61) October 31, 2025
राऊत यांनी सामाजिक माध्यमांवर प्रसिद्ध केलेल्या पत्रकातून कार्यकर्त्यांना याबाबत कळवले. “वैद्यकीय तज्ञांच्या सल्ल्यानुसार गर्दीत मिसळणे आणि बाहेर जाणे टाळण्याचे निर्देश मिळाले आहेत. उपचार सुरू असून लवकरच प्रकृतीत सुधारणा होईल,” अशी माहिती त्यांनी दिली.
मुलुंड येथील फोर्टिस रुग्णालयात काही दिवसांपूर्वी त्यांना दाखल करण्यात आले होते. प्राथमिक उपचारानंतर त्यांना घरी सोडण्यात आले असले तरी त्यानंतर प्रकृतीत गंभीर बिघाड झाल्याचे स्पष्ट झाले. या पार्श्वभूमीवर येत्या काळात होणाऱ्या ‘सत्याचा मोर्चा’त राऊत सहभागी होणार नाहीत, असे संकेत त्यांच्या पत्रातून मिळतात.
राऊत यांच्या अनुपस्थितीमुळे ठाकरे गटाच्या राजकीय हालचालींवर तात्पुरता परिणाम होण्याची शक्यता वर्तवली जात आहे. मात्र, पक्षातील वरिष्ठ नेते परिस्थिती हाताळण्यासाठी सज्ज असल्याचे सांगितले जात आहे.
‘राऊत यांचे पत्र, थोडक्यात’
“आपण दिलेला विश्वास आणि प्रेम माझ्यासाठी अतुलनीय आहे. अचानक प्रकृतीत बिघाड झाल्याने काही काळ सार्वजनिक जीवनातून दूर राहावे लागत आहे. उपचार सुरू असून मी लवकरच बरा होईन. नवीन वर्षाच्या सुरुवातीला पुन्हा भेटू.”
राऊत यांच्या प्रकृतीत लवकर सुधारणा व्हावी, अशी इच्छा व्यक्त करणारे संदेश सोशल मीडियावर उमटू लागले आहेत. त्यांच्या प्रकृतीविषयी पक्ष कार्यकर्ते आणि समर्थकांमध्येही काळजीचे वातावरण आहे.
