सातारा, प्रतिनिधी
साताऱ्यातील सासपडे (ता. जि. सातारा) येथे घडलेल्या अल्पवयीन शालेय मुलीच्या निर्घृण खुनाचा तपास केवळ २४ तासांत उलगडण्यात स्थानिक गुन्हे शाखा सातारा आणि बोरगाव पोलिसांनी उल्लेखनीय कामगिरी बजावली आहे. पोलिसांनी संशयित आरोपी राहुल बबन यादव (वय ३४, रा. सासपडे, ता. जि. सातारा, व्यवसाय,मजुरी) याला अटक केली आहे.
१० ऑक्टोबर रोजी दुपारी सासपडे येथे एका अल्पवयीन मुलीचा तिच्याच घरात घुसून अज्ञात इसमाने डोक्यात वार करून खून केला होता. या प्रकरणी बोरगाव पोलिस ठाण्यात गुन्हा दाखल करण्यात आला. घटनेचे गांभीर्य लक्षात घेऊन पोलिस अधीक्षक तुषार दोशी, अपर पोलिस अधीक्षक डॉ. वैशाली कडुकर, उपविभागीय पोलिस अधिकारी राजीव नवले आणि स्थानिक गुन्हे शाखेचे पोलिस निरीक्षक अरुण देवकर यांनी घटनास्थळी भेट देऊन तपासाची दिशा ठरवली.
घटनास्थळी सीसीटीव्ही फुटेज उपलब्ध नसल्याने तपास अडचणीत आला होता. मात्र, स्थानिक गुन्हे शाखेच्या पथकाने गोपनीय माहितीदारांच्या मदतीने परिसरात शोधमोहीम सुरू केली. त्यानंतर ११ ऑक्टोबर रोजी आरोपी सासपडे,नागठाणे मार्गावरील टेकडीवर असल्याची माहिती पोलिस निरीक्षक अरुण देवकर यांना मिळाली. त्यानुसार पोलीस उपनिरीक्षक विश्वास शिंगाडे यांच्या पथकाने छापा टाकून आरोपीला ताब्यात घेतले. चौकशीत आरोपीने गुन्ह्याची कबुली दिली आहे.
कोणतेही ठोस पुरावे नसतानाही पोलिसांनी केवळ सुक्ष्म तपास आणि माहितीदारांच्या मदतीने हा गुन्हा उघडकीस आणला. ही कारवाई पोलिस अधीक्षक तुषार दोशी, अपर पोलिस अधीक्षक डॉ. वैशाली कडुकर, उपविभागीय पोलिस अधिकारी राजीव नवले यांच्या मार्गदर्शनाखाली करण्यात आली.
तपास पथकात पोलिस निरीक्षक अरुण देवकर, सहाय्यक पोलिस निरीक्षक रोहित फार्णे, पो.उ.नि. विश्वास शिंगाडे, परितोष दातीर, अंमलदार संतोष सपकाळ, मंगेश महाडिक, अमोल माने, अजित कर्णे, जयवंत खांडके, पंकज बेसके, शिवाजी भिसे, स्वप्निल दौंड, रविराज वर्णेकर आणि संभाजी साळुंखे यांचा समावेश होता.
बोरगाव पोलिस ठाण्याचे सहाय्यक पोलिस निरीक्षक धोंडीराम वाळवेकर, तसेच निलेश गायकवाड, प्रशांत चव्हाण, मोहन चव्हाण, सतीश पवार, विशाल जाधव, समाधान जाधव व महिला अंमलदार नम्रता जाधव यांनीही तपासात सक्रिय सहभाग घेतला.
या यशस्वी कारवाईबद्दल पोलिस अधीक्षक तुषार दोशी आणि अपर पोलिस अधीक्षक डॉ. वैशाली कडुकर यांनी सर्व अधिकारी व अंमलदारांचे अभिनंदन केले आहे.
