नाशिक प्रतिनिधी
त्र्यंबकेश्वर येथे चार ते पाच पत्रकारांवर अमानुष मारहाणीची घटना घडल्याने खळबळ उडाली आहे. या हल्ल्यात काही पत्रकार जखमी झाले असून, पत्रकार समाजात संतापाची लाट पसरली आहे.
घटनेची माहिती मिळताच मुख्यमंत्री देवेंद्र फडणवीस यांनी तातडीने नाशिक जिल्हाधिकाऱ्यांशी संपर्क साधला. दोषींना ताब्यात घेऊन कठोर कारवाई करण्याचे आदेश त्यांनी दिले आहेत. या प्रकरणात कोणत्याही प्रकारची सुटकेची जागा नसल्याचा इशाराही फडणवीसांनी दिला.
दरम्यान, राज्याचे मंत्री छगन भुजबळ आणि गिरीश महाजन यांनी जखमी पत्रकारांना भेटून त्यांच्या प्रकृतीची विचारपूस केली. तसेच, या घटनेची तात्काळ नोंद घेऊन गुन्हा दाखल करण्याची प्रक्रिया सुरू असल्याचे प्रशासनाने स्पष्ट केले.
मुख्यमंत्र्यांच्या आदेशानंतर संबंधित अधिकाऱ्यांनी घटनास्थळी भेट देऊन तपासाला सुरुवात केली आहे. या प्रकारामुळे पत्रकारांच्या सुरक्षिततेचा प्रश्न पुन्हा एकदा ऐरणीवर आला असून, कायदा व सुव्यवस्थेच्या कक्षा अधिक बळकट करण्याची गरज अधोरेखित झाली आहे.
