खेड प्रतिनिधी
खेड तालुक्यातील कडूस गावातून तब्बल अडीच वर्षांपूर्वी एका मतिमंद व्यक्तीचे अपहरण करून त्याला गुलामासारखे काम करायला लावण्यात आल्याचा धक्कादायक प्रकार उघड झाला आहे. या काळात त्याच्यावर अमानुष छळही करण्यात आला.
अपहरण करून साताऱ्यात नेले
प्रवीण ऊर्फ नागेश मधुकर टोके (वय 43, रा. गुंजवठा चास, ता. खेड) याचे 23 एप्रिल 2023 रोजी अपहरण करण्यात आले. त्याला सातारा जिल्ह्यातील खंडाळा तालुक्यातील अंदोरी येथे नेऊन डांबून ठेवण्यात आले होते.
गाईंचा गोठा साफ करणे, पाणी पाजणे अशी कामे
प्रवीण टोके याला सातत्याने श्रमाची कामे करायला लावण्यात आली. गाईंचा गोठा साफ करणे, गवत व सरपण आणणे, गाईंना पाणी पाजणे अशी जबरदस्तीची कामे त्याच्याकडून करून घेतली जात होती.
काम न केल्यास मारहाण
कामास नकार दिल्यास किंवा थोडी चूक झाल्यास त्याला निर्दय मारहाण केली जात होती. एवढेच नव्हे, तर पाठीवर, हातावर आणि कानावर गरम सळईचे चटके देऊन अमानुष छळ करण्यात आल्याचे समोर आले आहे.
आरोपींवर गुन्हा दाखल
या प्रकरणी बंडू सहादू साळुंके (रा. वडगाव पाटोळे, ता. खेड), सचिन रघुनाथ चव्हाण (रा. कडूस, ता. खेड) आणि दोन अनोळखी व्यक्तींविरुद्ध खेड पोलिस ठाण्यात गुन्हा दाखल करण्यात आला आहे.
भावाने दिली फिर्याद
प्रवीण यांचा भाऊ प्रदीप मधुकर टोके यांनी यासंदर्भात खेड पोलिस ठाण्यात तक्रार दिली. त्यानुसार पोलिसांनी गुन्हा दाखल करून तपास सुरू केला आहे.
पुढील तपास खेड पोलिसांकडे
या प्रकरणातील सविस्तर चौकशी सुरू असून आरोपींनी मतिमंद व्यक्तीला गुलामासारखी वागणूक का दिली आणि या कटात आणखी कोण सहभागी आहेत, याचा तपास सुरू आहे.
