मुंबई प्रतिनिधी
मुंबई | घाटकोपरच्या रमाबाई नगर परिसरात रविवारी एक हृदयद्रावक घटना घडली. आठ वर्षांची एक मुलगी नाल्यात पडलेल्या बॉलसाठी खाली उतरली आणि अडकून पडली. यावेळी शहजाद शेख या २६ वर्षीय तरुणाने प्रसंगावधान राखत मुलीचा जीव वाचवण्यासाठी धाडसाने नाल्यात उडी घेतली. त्याने मुलीला सुखरूप बाहेर काढले, मात्र दुर्दैवाने शेख स्वतः नाल्यातील गाळात अडकून राहिला आणि त्यातच त्याचा मृत्यू झाला.
शेख नाल्यात अडकल्याचे लक्षात येताच स्थानिक नागरिकांनी मदतीसाठी धाव घेतली. तत्काळ अग्निशमन दलाला पाचारण करण्यात आले. दलाने अथक प्रयत्न करून शेखला बाहेर काढून जवळच्या रुग्णालयात नेले. मात्र डॉक्टरांनी त्याला मृत घोषित केले.
शहजाद शेखने दाखवलेले धाडस आणि परोपकार भाव हे कौतुकास्पद असले तरी त्याचा अंत अतिशय दु:खद ठरला. पोलिसांनी या प्रकरणी आकस्मिक मृत्यूची नोंद केली आहे. या घटनेनंतर परिसरात आणि शेखच्या कुटुंबात शोककळा पसरली आहे.
शेखचे हे बलिदान सर्वांसाठी प्रेरणादायी असले तरी एक धक्का देणारे वास्तव समोर आणते – की अशा धोकादायक ठिकाणी सुरक्षा उपाययोजनांची किती गरज आहे.
