मुंबई प्रतिनिधी
डॉ. बाबासाहेब आंबेडकर यांचे विचार, आंबेडकरी चळवळ आणि ‘भीमशक्ती’च्या पाठबळामुळेच आपण केंद्रीय मंत्रीपदापर्यंत पोहोचू शकलो, अशी कृतज्ञ भावना रिपब्लिकन पार्टी ऑफ इंडियाचे (रिपाइं) अध्यक्ष तथा केंद्रीय सामाजिक न्याय राज्यमंत्री रामदास आठवले यांनी व्यक्त केली. केंद्रीय राज्यमंत्री म्हणून दशकपूर्ती केल्याबद्दल शुक्रवारी चव्हाण सेंटर येथे मुख्यमंत्री देवेंद्र फडणवीस यांच्या हस्ते आठवले यांचा नागरी सत्कार करण्यात आला. या वेळी आठवले यांनी आपल्या राजकीय प्रवासाला उजाळा देताना आगामी राजकीय वाटचालीबाबतही विश्वास व्यक्त केला.
आंबेडकरी चळवळीत काम करताना अनेक विचारवंतांनी आपल्याला ‘भाकरी फिरवण्याचा’ सल्ला दिला. त्यानुसार शिवसेना-भाजपसोबत युती करण्याचा निर्णय घेतला. पुढे हीच राजकीय आघाडी महायुतीच्या रूपात विस्तारली. या राजकीय वाटचालीमुळेच केंद्रात मंत्रीपदाची संधी मिळाली, असे आठवले यांनी सांगितले.
“डॉ. बाबासाहेब आंबेडकर आणि भीमशक्तीमुळे मी केंद्रीय मंत्रीपदाच्या तख्तापर्यंत पोहोचू शकलो. माझ्या राजकीय आणि सामाजिक प्रवासात आंबेडकरी विचारांची ताकद कायम माझ्या पाठीशी राहिली,” असे आठवले म्हणाले. आगामी लोकसभा निवडणुकीच्या पार्श्वभूमीवरही त्यांनी महायुतीच्या राजकीय भवितव्याबाबत विश्वास व्यक्त केला. २०२९ मध्ये केंद्रात राष्ट्रीय लोकशाही आघाडीची सत्ता पुन्हा येईल आणि आपण पुन्हा केंद्रीय राज्यमंत्री होऊ, असा विश्वास त्यांनी व्यक्त केला.
संघर्षातून राजकारणात उंच भरारी
रामदास आठवले यांनी दलित पँथरच्या माध्यमातून सामाजिक अन्यायाविरोधात संघर्ष केला. आंबेडकरी चळवळीतील कार्यकर्ता ते केंद्रीय मंत्री असा त्यांचा प्रवास संघर्षमय राहिला. सामाजिक प्रश्नांवर आक्रमक भूमिका घेत असतानाच विविध राजकीय पक्षांशी संवाद साधण्याची भूमिका त्यांनी कायम ठेवली.
मुख्यमंत्री देवेंद्र फडणवीस यांनी आठवले यांच्या या राजकीय प्रवासाचे कौतुक केले. संघर्षाच्या काळातही त्यांच्या मनात कोणत्याही व्यक्ती, जाती किंवा राजकीय पक्षाविषयी कटुता राहिली नाही. सर्वांशी सुसंवाद साधण्याची त्यांची भूमिका राहिली. महायुतीला महामानव डॉ. बाबासाहेब आंबेडकर यांच्या विचारांशी जोडण्याचे महत्त्वाचे काम आठवले यांनी केले, असे फडणवीस म्हणाले.
“आठवले संघर्षातून पुढे आले असले तरी त्यांच्या मनात कोणाबद्दलही तेढ नाही. त्यांनी कायम सर्वांशी संवाद साधला. त्यांच्या योगदानामुळे महायुती आणि आंबेडकरी विचार यांच्यातील दुवा अधिक मजबूत झाला. पुढील दहा वर्षेही रामदास आठवले केंद्रात मंत्री राहतील,” असा विश्वास मुख्यमंत्री फडणवीस यांनी व्यक्त केला.
‘सामाजिक न्यायाच्या चळवळीचे सम्यक नेतृत्व’
उपमुख्यमंत्री एकनाथ शिंदे यांनीही रामदास आठवले यांच्या कार्याचा गौरव केला. डॉ. बाबासाहेब आंबेडकर यांच्या विचारांचे आठवले हे खरे अनुयायी असून सामाजिक न्यायाच्या चळवळीचे त्यांनी सम्यक नेतृत्व केले आहे, असे शिंदे म्हणाले.
आठवले यांनी सामाजिक न्याय, वंचित घटकांचे प्रश्न आणि आंबेडकरी विचारांच्या प्रसारासाठी सातत्याने भूमिका घेतली. विविध राजकीय समीकरणांमध्ये काम करत असतानाही सामाजिक प्रश्नांवरील त्यांचा आवाज कायम राहिला, असेही या वेळी वक्त्यांनी नमूद केले.
मान्यवरांची उपस्थिती
या नागरी सत्कार सोहळ्यात राज्याचे अन्न व नागरी पुरवठा मंत्री छगन भुजबळ, मुंबई उपनगरचे सहपालकमंत्री मंगलप्रभात लोढा, विधानसभा अध्यक्ष राहुल नार्वेकर, विधानसभा उपाध्यक्ष अण्णासाहेब बनसोडे, भाजप आमदार प्रवीण दरेकर यांच्यासह विविध क्षेत्रांतील मान्यवर उपस्थित होते.
यावेळी उपस्थित मान्यवरांनी आपल्या भाषणातून आठवले यांच्या राजकीय आणि सामाजिक कार्याचा गौरव केला. अनेक वक्त्यांनी चारोळ्यांच्या माध्यमातून आठवले यांना शुभेच्छा देत त्यांच्या मिश्कील आणि काव्यात्मक शैलीचाही आवर्जून उल्लेख केला.
सत्कार सोहळ्यास रामदास आठवले यांच्या पत्नी सीमा आठवले, पुत्र जीत आठवले, रिपाइंचे सरचिटणीस अविनाश महातेकर, राज्य कार्याध्यक्ष बाबुराव कदम, राज्य सरचिटणीस गौतम सोनवणे यांच्यासह पक्षाचे पदाधिकारी, कार्यकर्ते आणि समर्थक मोठ्या संख्येने उपस्थित होते.
केंद्रीय मंत्री म्हणून दशकपूर्तीचा हा टप्पा गाठताना आठवले यांनी आपल्या राजकीय प्रवासाचे श्रेय आंबेडकरी विचारधारा आणि ‘भीमशक्ती’ला दिले. त्यामुळे त्यांच्या या सत्कार सोहळ्यात केवळ राजकीय कारकिर्दीचा गौरव नव्हे, तर आंबेडकरी चळवळीपासून केंद्रीय सत्तेच्या केंद्रापर्यंत पोहोचलेल्या त्यांच्या प्रदीर्घ प्रवासाचा गौरव झाल्याचे चित्र पाहायला मिळाले.
