मुंबई प्रतिनिधी
मुंबई आणि उपनगरांमध्ये मुसळधार पावसाचा इशारा लक्षात घेऊन विद्यार्थ्यांच्या सुरक्षिततेच्या दृष्टीने मुंबईतील सर्व शासकीय, खासगी, अनुदानित तसेच बृहन्मुंबई महानगरपालिका (बीएमसी) अंतर्गत येणाऱ्या शाळा आणि महाविद्यालयांना आज, मंगळवार (७ जुलै) एक दिवसाची सुट्टी जाहीर करण्यात आली आहे. हवामान विभागाने (आयएमडी) शहरासाठी ‘ऑरेंज अलर्ट’ जारी केल्यानंतर प्रशासनाने हा निर्णय घेतला.
भारतीय हवामान विभागाने पुढील २४ तासांत मुंबई आणि परिसरात मुसळधार ते अतिमुसळधार पावसाची शक्यता व्यक्त केली आहे. काही ठिकाणी ताशी ४० ते ५० किलोमीटर वेगाने वारे वाहण्याचा अंदाजही वर्तविण्यात आला आहे. त्यामुळे सखल भागांत पाणी साचणे, वाहतुकीवर परिणाम होणे तसेच झाडे कोसळण्याच्या घटनांमध्ये वाढ होण्याची शक्यता प्रशासनाने व्यक्त केली आहे.
या पार्श्वभूमीवर विद्यार्थ्यांचा प्रवास सुरक्षित राहावा आणि संभाव्य गैरसोय टाळता यावी, यासाठी सर्व शाळा व महाविद्यालये बंद ठेवण्याचा निर्णय घेण्यात आला. शैक्षणिक संस्थांना विद्यार्थी आणि पालकांना तातडीने याबाबत माहिती देण्याच्या सूचनाही देण्यात आल्या आहेत.
दरम्यान, बृहन्मुंबई महानगरपालिकेने नागरिकांना सतर्क राहण्याचे आवाहन केले आहे. अत्यावश्यक कामाशिवाय घराबाहेर पडणे टाळावे, सखल भाग, समुद्रकिनारे, नाले आणि पाण्याने भरलेल्या रस्त्यांपासून दूर राहावे, असे आवाहन करण्यात आले आहे. जोरदार पावसामुळे वाहतुकीत अडथळे निर्माण होण्याची शक्यता असल्याने नागरिकांनी प्रवासापूर्वी वाहतूक आणि हवामानाची अद्ययावत माहिती घेण्याचा सल्लाही देण्यात आला आहे.
पालिकेने सर्व आपत्कालीन यंत्रणा सज्ज ठेवत आपत्ती व्यवस्थापन कक्ष, अग्निशमन दल, आरोग्य विभाग आणि अभियांत्रिकी विभागांना दक्ष राहण्याचे निर्देश दिले आहेत. पाणी उपसण्यासाठी पंप, बचाव पथके आणि आवश्यक यंत्रसामग्री तैनात ठेवण्यात आली असून, परिस्थितीवर चोवीस तास नियंत्रण ठेवले जात असल्याचे प्रशासनाने स्पष्ट केले.
कोणतीही आपत्कालीन परिस्थिती उद्भवल्यास नागरिकांनी बृहन्मुंबई महानगरपालिकेच्या १९१६ या हेल्पलाइन क्रमांकावर संपर्क साधावा, तसेच प्रशासन आणि हवामान विभागाकडून वेळोवेळी जारी करण्यात येणाऱ्या सूचनांचे काटेकोरपणे पालन करावे, असे आवाहन करण्यात आले आहे.
मुंबईसह ठाणे, पालघर आणि रायगड जिल्ह्यांमध्येही पावसाचा जोर कायम राहण्याचा अंदाज व्यक्त करण्यात आला असून, पुढील काही तास हवामानाच्या दृष्टीने महत्त्वाचे मानले जात आहेत. त्यामुळे प्रशासनाने सर्व संबंधित यंत्रणांना सतर्क राहण्याचे आदेश दिले आहेत.
