मुंबई प्रतिनिधी
अखिल भारतीय मराठी चित्रपट महामंडळाच्या पंचवार्षिक निवडणुकीत मेघराज राजे भोसले यांच्या नेतृत्वाखालील ‘समर्थ पॅनेल’ने एकहाती वर्चस्व प्रस्थापित करत सर्वच्या सर्व उमेदवारांना विजयी करून आणले. सोमवारी जाहीर झालेल्या निकालानंतर महामंडळाची सूत्रे पुढील पाच वर्षांसाठी पुन्हा एकदा भोसले यांच्या नेतृत्वाखालील कार्यकारिणीकडे जाणार असल्याचे स्पष्ट झाले. दुसरीकडे, अभिनेत्री वर्षा उसगावकर यांच्या गटाला या निवडणुकीत अपेक्षित यश मिळू शकले नाही.
महामंडळाची निवडणूक रविवारी मुंबईसह पुणे, नाशिक, कोल्हापूर आणि सोलापूर या विभागांमध्ये शांततापूर्ण वातावरणात पार पडली. एकूण ३,४०३ मतदारांपैकी १,६९८ सभासदांनी मतदानाचा हक्क बजावला. चित्रपटसृष्टीतील विविध घटकांच्या प्रतिनिधित्वासाठी झालेल्या या निवडणुकीकडे संपूर्ण मराठी चित्रपट क्षेत्राचे लक्ष लागले होते.
निकालात मेघराज राजे भोसले यांच्या ‘समर्थ पॅनेल’ने स्पष्ट बहुमत मिळवत प्रतिस्पर्ध्यांचा पूर्णपणे पराभव केला. सुनील महाजन, दीपक कदम, अजित शिरोळे, राज काझी, सुशांत शेलार, धनाजी यमकर, सुभाष नकाशे, शरद चव्हाण, प्रवीण पाटील, चैत्राली डोंगरे, रवींद्र गावडे, गणेश गारगोटे आणि विकास तोरणे यांच्यासह समर्थ पॅनेलमधील सर्व उमेदवार विजयी झाले. त्यामुळे महामंडळाच्या नव्या कार्यकारिणीवर समर्थ पॅनेलचे निर्विवाद वर्चस्व राहणार आहे.
सभासदांनी कामावर शिक्कामोर्तब केल्याचा दावा
विजयानंतर प्रतिक्रिया देताना मेघराज राजे भोसले यांनी हा निकाल त्यांच्या गेल्या दशकभरातील कार्याची पावती असल्याचे म्हटले. निवडणूक प्रचारादरम्यान विरोधी गटाकडून विविध आरोप करण्यात आले होते. मात्र सभासदांनी मतदानातून ते आरोप फेटाळून लावत आपल्या कामावर विश्वास व्यक्त केल्याचे त्यांनी सांगितले.
“गेल्या दहा वर्षांत महामंडळासाठी केलेल्या कामावर सभासदांनी पुन्हा एकदा विश्वास दाखवला आहे. निवडणुकीच्या काळात आमच्यावर अनेक आरोप झाले, मात्र आजच्या निकालातून सभासदांनी त्यांना उत्तर दिले आहे. हा विजय आमच्या कार्याची पावती असून, यापुढेही अधिक जोमाने आणि समर्पितपणे काम करण्याची प्रेरणा आम्हाला मिळाली आहे,” असे भोसले यांनी सांगितले.
चित्रपटसृष्टीसमोरील प्रश्नांवर लक्ष
नव्या कार्यकारिणीसमोर मराठी चित्रपटसृष्टीतील आर्थिक अडचणी, चित्रपट प्रदर्शनासाठी उपलब्ध पडद्यांची संख्या, निर्माते-वितरक यांच्यातील समन्वय, तंत्रज्ञ व कलाकारांच्या विविध प्रश्नांसह उद्योगाशी संबंधित अनेक महत्त्वाचे विषय असणार आहेत. निवडणुकीतील विजयामुळे या प्रश्नांवर प्रभावीपणे काम करण्याची संधी मिळाल्याचे समर्थ पॅनेलमधील पदाधिकाऱ्यांनी सांगितले.
विजयानंतर जल्लोष
निकाल जाहीर होताच समर्थ पॅनेलच्या समर्थकांनी जल्लोष साजरा केला. कार्यकर्ते आणि पदाधिकाऱ्यांनी एकमेकांचे अभिनंदन करत सभासदांचे आभार मानले. महामंडळाच्या सर्व घटकांना सोबत घेऊन पारदर्शक, विकासाभिमुख आणि सर्वसमावेशक कारभार करण्याचा निर्धार यावेळी व्यक्त करण्यात आला.
या निकालामुळे अखिल भारतीय मराठी चित्रपट महामंडळातील सत्तासमीकरणे स्पष्ट झाली असून, पुढील पाच वर्षांत मेघराज राजे भोसले यांच्या नेतृत्वाखाली महामंडळ कोणत्या दिशेने वाटचाल करते, याकडे मराठी चित्रपटसृष्टीचे लक्ष लागले आहे.
