नवी दिल्ली वृत्तसंस्था
भारतरत्न डॉ. बाबासाहेब आंबेडकर यांच्या ६९ व्या महापरिनिर्वाण दिनानिमित्त राष्ट्रभरातून कृतज्ञतेची भावना व्यक्त होत असताना, आज प्रमुख राजकीय नेतृत्वाने त्यांच्या स्मृतीस अर्पण केलेल्या अभिवादनांतून संविधान शिल्पकारांबद्दलची श्रद्धा पुन्हा एकदा अधोरेखित झाली.
६ डिसेंबर १९५६ रोजी दिल्लीत बाबासाहेबांची प्राणज्योत मालवली. त्यानंतर प्रत्येक वर्षी हा दिवस ‘महापरिनिर्वाण दिन’ म्हणून पाळला जातो. आज देशभरातील अनुयायी, अभ्यासक आणि नागरिकांनी विविध कार्यक्रमांतून त्यांना आदरांजली वाहिली.
राष्ट्रपती द्रौपदी मुर्मू, पंतप्रधान नरेंद्र मोदी, गृहमंत्री अमित शाह यांसह विविध पक्ष नेत्यांनी आज सकाळी सामाजिक माध्यमांतून आणि प्रत्यक्ष कार्यक्रमांतून बाबासाहेबांना श्रद्धांजली वाहिली.
मोदी : “आंबेडकरांचे विचार राष्ट्रप्रवासाला दिशा देणारे”
पंतप्रधान नरेंद्र मोदी यांनी X वर लिहिताना म्हटले की, “महापरिनिर्वाण दिनानिमित्त डॉ. बाबासाहेब आंबेडकरांना विनम्र अभिवादन! न्याय, समानता आणि घटनावादाच्या मूल्यांप्रती त्यांची निष्ठा आजही राष्ट्राच्या प्रवासाला दिशा देते.”
Remembering Dr. Babasaheb Ambedkar on Mahaparinirvan Diwas. His visionary leadership and unwavering commitment to justice, equality and constitutionalism continue to guide our national journey. He inspired generations to uphold human dignity and strengthen democratic values.
May…— Narendra Modi (@narendramodi) December 6, 2025
ते पुढे म्हणाले की, “मानवी गौरव टिकवण्यासाठी आणि लोकशाही अधिक सक्षम करण्यासाठी बाबासाहेबांनी दिलेली प्रेरणा पिढ्यान्पिढ्या मार्गदर्शक ठरली आहे. विकसित भारत उभारण्याच्या प्रयत्नांत त्यांच्या आदर्शांचा प्रकाश आमच्या वाटचालीला बल देणारा आहे.”
अमित शाह : “शिक्षण, सामाजिक न्याय आणि सक्षमीकरणाचे तेजस्वी प्रतीक”
गृहमंत्री अमित शाह यांनी बाबासाहेबांच्या योगदानाचे स्मरण करत म्हटले की, “शिक्षणाला सामाजिक परिवर्तनाचा मूलमंत्र मानणाऱ्या संविधान शिल्पकारांनी श्रमिक, शेतकरी, वंचित आणि उपेक्षित घटकांना अधिकार बहाल करून सामाजिक न्यायाचा सर्वोच्च आदर्श प्रस्थापित केला.”
शाह यांनी पुढे नमूद केले की, “समता आणि बंधुतेच्या मूल्यांवर उभारलेली सक्षम भारताची पायाभरणी करताना बाबासाहेबांनी राष्ट्रजीवनाच्या प्रत्येक क्षेत्रावर अमिट ठसा उमटवला. त्यांचे विराट व्यक्तिमत्त्व आणि कार्य प्रत्येक भारतीयासाठी लोकसेवेचा महान आदर्श आहे.”
शिक्षा को सामाजिक परिवर्तन का मूल मंत्र मानने वाले, देश के संविधान-शिल्पी बाबासाहेब डॉ. भीमराव अंबेडकर जी ने श्रमिकों, किसानों और कमजोर वर्गों को अधिकार देकर सामाजिक न्याय का सर्वोच्च आदर्श स्थापित किया। समता और बंधुता के आधार पर सशक्त भारत की नींव रखने वाले बाबासाहेब ने… pic.twitter.com/iEkRBvOKbW
— Amit Shah (@AmitShah) December 6, 2025
देशभरातून अभिवादनांची रांग
महापरिनिर्वाण दिनानिमित्त मुंबईतील चैत्यभूमीसह देशभरातील स्मारकस्थळी आज मोठी गर्दी पाहायला मिळाली. सामाजिक संघटना, विद्यार्थी गट, अभ्यासक आणि सामान्य नागरिकांनी बाबासाहेबांच्या प्रतिमेस पुष्पांजली अर्पण केली.
महापरिनिर्वाण दिनाला प्रत्येक वर्षीप्रमाणेच आजही संविधानाचे महत्व, सामाजिक न्यायाची गरज आणि समानतेच्या मूल्यांवर व्यापक चर्चेला उधाण आले.
भारतरत्न डॉ. बाबासाहेब आंबेडकरांच्या स्मृतीस आज कृतज्ञ राष्ट्राने अभिवादन करताना त्यांच्या विचारसरणीची आधुनिक भारतासाठी असलेली उपयुक्तता पुन्हा अधोरेखित केली. त्यांच्या मार्गदर्शक तत्त्वांनी राष्ट्राचा प्रवास उजळत राहावा, अशीच भावना आजच्या अभिवादनांतून प्रकर्षाने उमटली.
