मुंबई प्रतिनिधी
झोपडपट्टी पुनर्वसन प्राधिकरणाच्या (एसआरए) बृहन्मुंबई कार्यालयात संविधान दिन उत्साहात साजरा करण्यात आला. मुख्य कार्यकारी अधिकारी डॉ. महेंद्र कल्याणकर यांच्या मार्गदर्शनाखाली आयोजित या कार्यक्रमास प्राधिकरणातील सर्व अधिकारी व कर्मचारी मोठ्या संख्येने उपस्थित होते.
संविधान दिनानिमित्त झोपडपट्टी पुनर्वसन प्राधिकरण, बृहन्मुंबई कार्यालयात भारतीय संविधानाच्या उद्देशिकेचे सामूहिक वाचन करण्यात आले. याप्रसंगी टिपलेले क्षणचित्रे. #भारतीयसंविधानदिन#संविधान #IndianConstitutionDay#Constitution#ConstitutionDay pic.twitter.com/fmPMYvjb2L
— Slum Rehabilitation Authority, Brihanmumbai (@srabrihanmumbai) November 26, 2025
सकाळच्या सत्रात संविधान दिनाचे महत्त्व, राज्यघटनादृष्ट्या नागरिकांच्या कर्तव्यांची आणि अधिकारांची जाणीव यावर थोडक्यात प्रकाश टाकण्यात आला. त्यानंतर उपस्थितांनी भारतीय संविधानाच्या उद्देशिकेचे सामूहिक वाचन करून लोकशाही, समानता, स्वातंत्र्य आणि बंधुता या मूल्यांप्रती निश्‍चय पुन्हा दृढ केला.
डॉ. कल्याणकर यांनी या प्रसंगी बोलताना, “संविधान केवळ एक कायदेशीर दस्तावेज नसून देशाच्या प्रगतीचा मार्गदर्शक आहे. शासकीय सेवेमध्ये असताना आपण संविधानिक मूल्यांचा आदर राखत पारदर्शकता, जबाबदारी आणि नागरिकहिताला प्राधान्य द्यायला हवे,” असे सांगितले.
प्राधिकरणातील विविध विभागांतील अधिकारी-कर्मचारी या कार्यक्रमात उत्स्फूर्तपणे सहभागी झाले. संविधान दिनाचे औचित्य साधून कार्यालयात माहितीपत्रक, उद्देशिका पोस्टर्स आणि जागरुकता फलकांचे प्रदर्शनही करण्यात आले.
लोकशाहीविषयक मूल्यांची पुनर्रचना आणि प्रशासनातील कर्मचाऱ्यांमध्ये संवैधानिक भान दृढ करण्याच्या दृष्टीने हा उपक्रम महत्त्वाचा ठरला, असे प्राधिकरणाकडून सांगण्यात आले.
