नाशिक प्रतिनिधी
मनमाड नगर परिषद निवडणुकीच्या तोंडावर ठाकरे गटाला अनपेक्षित धक्का बसला आहे. प्रभाग क्रमांक १०-अ मधील शिवसेना (उद्धव बाळासाहेब ठाकरे) गटाचे उमेदवार नितीन वाघमारे (वय ५०) यांचे सोमवारी रात्री अचानक हृदयविकाराच्या झटक्याने निधन झाले. सक्रिय शिवसैनिक म्हणून ओळख असलेल्या वाघमारे यांच्या निधनाने पक्षाच्या स्थानिक पातळीवरील कार्यकर्त्यांत शोककळा पसरली आहे.
गायकवाड चौक परिसरातील रहिवासी असलेले नितीन वाघमारे हे दीड दशकाहून अधिक काळ मनमाडमध्ये ठाकरे गटाचे प्रमुख चेहेरे मानले जात होते. निवडणूक प्रचाराच्या धावपळीमध्ये त्यांच्या अचानक जाण्याने प्रभागातील समीकरणे बदलण्याची शक्यता आहे. आचारसंहितेनुसार या प्रभागात आता नवीन उमेदवाराची निवड करण्याची जबाबदारी ठाकरे गटावर येणार आहे.
वाघमारे यांच्या निधनाची माहिती मिळताच स्थानिक नेते, कार्यकर्ते आणि नागरिकांनी त्यांच्या निवासस्थानी मोठी गर्दी केली. राजकीय, सामाजिक क्षेत्रातील मान्यवरांनीही शोक व्यक्त करत त्यांच्या कार्याची आठवण केली.
मनमाड निवडणूक: तिरंगी, चौरंगी लढतीत रंगत
तब्बल नऊ वर्षांनंतर होणाऱ्या मनमाड नगर परिषदेच्या निवडणुकीत या वर्षी विशेष उत्साह पाहायला मिळत आहे. उमेदवारी माघारीनंतर सुरू झालेल्या खऱ्या लढतीच्या टप्प्यात राजकीय तापमान चांगलेच वाढले आहे.
नगराध्यक्ष पदासाठी: 9 उमेदवार
• नगरसेवक पदांसाठी: 33 जागांवर तब्बल 215 उमेदवार
• प्रभागांची संख्या: 16
बहुसंख्य प्रभागांत तिरंगी आणि चौरंगी लढती रंगल्या आहेत.
या निवडणुकीत तरुण उमेदवारांचा भरणा विशेष जाणवत असून गल्लीबोळांत प्रचाराला वेग आला आहे. मतदारांशी थेट संपर्क साधण्यावर सर्व पक्षांनी भर दिला आहे. काही माजी नगरसेवकांना मात्र जनतेचा नाराजीचा सूरही ऐकावा लागत आहे.
नगराध्यक्ष पदाची प्रमुख लढत
• भाजप-शिवसेना-आरपीआय महायुती: बोगेश पाटील
• शिवसेना (उबाठा): प्रवीण नाईक
• राष्ट्रवादी (अजित पवार गट): रविंद्र घोडेस्वार
• राष्ट्रवादी (शरद पवार गट): शुभम चुनियान
• वंचित बहुजन आघाडी: नितीन जाधव
• बहुजन समाज पक्ष: प्रवीण पगारे
• अपक्ष: राजू निरभवणे, निमदेव हिरे आदी
काँग्रेसनेदेखील नऊ प्रभागांत उमेदवार उभे करून या लढतीत स्वतंत्र छाप सोडण्याचा प्रयत्न केला आहे. वंचित, बसपा आणि अपक्ष उमेदवारांच्या सहभागामुळे अनेक प्रभागांत मतदानाची दिशा अंतिम क्षणापर्यंत अनिश्चित राहण्याची शक्यता आहे.
नितीन वाघमारे यांच्या अकस्मात निधनामुळे ठाकरे गटाच्या निवडणूक धोरणावर तात्कालिक परिणाम होणे अपरिहार्य मानले जात आहे. तरीही मनमाडच्या राजकीय वातावरणात निवडणुकीची धुसफूस कायम असून येत्या काही दिवसांत जनतेचा कौल कोणाच्या बाजूने झुकतो, याकडे संपूर्ण जिल्ह्याचे लक्ष लागले आहे.
