घर द्या, अन्यथा आंदोलन तीव्र होईल”
मुंबई प्रतिनिधी
बृहन्मुंबई महानगरपालिकेतील सफाई खात्यातील कामगारांना मालकी हक्काची घरे, लाडपागे समितीच्या शिफारशींची अंमलबजावणी आणि इतर प्रलंबित मागण्यांसाठी आज (बुधवार, १२ नोव्हेंबर) आझाद मैदानावर म्युनिसिपल मजदूर युनियन, मुंबई तर्फे लाक्षणिक उपोषण सुरू झाले.
युनियनचे अध्यक्ष अशोक जाधव, सरचिटणीस वामन कविस्कर आणि कार्याध्यक्ष यशवंतराव देसाई यांच्या नेतृत्वाखाली सकाळी १० ते संध्याकाळी ६ वाजेपर्यंत हे उपोषण करण्यात आले . या आंदोलनात संघटनेचे उपाध्यक्ष, संघटक, कार्यकर्ते आणि सफाई खात्याचे शेकडो कामगार सहभागी झाले आहेत.
सफाई कामगारांना दीर्घकाळापासून घरे देण्याचे आश्वासन मिळत असले तरी अद्याप ठोस कार्यवाही झालेली नाही, असा आरोप युनियनने केला आहे. लाडपागे समितीच्या शिफारशींनुसार कामगारांना मालकी हक्काची घरे देण्याबाबत तातडीने निर्णय घ्यावा, अशी मागणी युनियनकडून करण्यात आली आहे.
याबाबत मुख्यमंत्री, उपमुख्यमंत्री आणि महानगरपालिका प्रशासनाने गांभीर्याने दखल घ्यावी, अशी युनियनची मागणी आहे. अन्यथा मुंबई महानगरपालिकेच्या निवडणुकीपूर्वी मोठ्या प्रमाणावर तीव्र आंदोलन छेडले जाईल, असा इशाराही युनियनने दिला आहे.
“कामगारांना आंदोलनाच्या मार्गावर ढकलण्यात आले, तर त्याची संपूर्ण जबाबदारी मुख्यमंत्री आणि महापालिका प्रशासनाची राहील,” असा इशारा म्युनिसिपल मजदूर युनियनने आपल्या निवेदनात दिला आहे.
