नवी दिल्ली वृत्तसंस्था
महिला क्रिकेट विश्वचषक जिंकल्यानंतर भारतीय संघाने पंतप्रधान नरेंद्र मोदी यांची नवी दिल्लीतील लोककल्याण मार्गावरील निवासस्थानी भेट घेतली. पंतप्रधानांनी संघाच्या ऐतिहासिक यशाबद्दल अभिनंदन करत त्यांच्या चिकाटीची व पुनरागमनाची प्रशंसा केली.
Vice Captain Smriti Mandhana said PM had motivated them and has been an inspiration for all of them. She also spoke about how girls are doing well in all fields today, and it is because of PM. Deepti Sharma said she had been waiting to meet the PM. She recalled their meeting in… pic.twitter.com/ONSrGYZcwv
— ANI (@ANI) November 5, 2025
स्पर्धेच्या सुरुवातीला सलग तीन पराभव झेलल्यानंतर संघाने दमदार पुनरागमन करत विश्वविजेतेपद पटकावले. या पार्श्वभूमीवर पंतप्रधान मोदींनी संघाच्या लढाऊ वृत्तीचे कौतुक केले. यावेळी महिला संघाने पंतप्रधानांना स्मृतिचिन्ह म्हणून स्वाक्षरी केलेली जर्सी भेट दिली.
कर्णधार हरमनप्रीत कौर हिने २०१७ मधील पंतप्रधानांसोबतची पहिली भेट आठवून सांगितले की, “तेव्हा कप नव्हता… आज विश्वचषक हातात घेऊन आपण इथे उभे आहोत, हे अवर्णनीय आहे.” हरमनप्रीतने मोदींना विचारले की ते नेहमी वर्तमानात कसे राहतात. प्रत्युत्तरात पंतप्रधान म्हणाले, “हे माझ्या जीवनाचा स्वभाव आहे. सरावानेच ही सवय अंगी आली.”
उपकर्णधार स्मृती मानधना म्हणाली, “पंतप्रधान नेहमी आमच्यासाठी प्रेरणास्थान राहिले आहेत. भारतातील मुली सर्व क्षेत्रात उंच भरारी घेत आहेत, हेही त्यांच्या प्रोत्साहनामुळेच.”
अष्टपैलू दीप्ती शर्मा हिनेही २०१७ मधील भेटीची आठवण काढली. “तेव्हा पंतप्रधानांनी कठोर परिश्रम करत स्वप्ने पूर्ण करण्याचा सल्ला दिला होता. आत्ताचा यशाचा क्षण त्याच प्रेरणेचा परिणाम आहे,” असे ती म्हणाली.
संभाषणादरम्यान मोदींनी हरमनप्रीतने अंतिम सामन्यानंतर चेंडू जपून ठेवण्याचा प्रसंग आठवला. तसेच अमनजोत कौरने अनेकदा सुटलेला कॅच अखेर पकडला, ती जिद्दही त्यांनी कौतुकाने अधोरेखित केली. “कॅच पकडताना चेंडू दिसतो, पण कॅचनंतर ट्रॉफी दिसते,” असे म्हणत मोदींनी खेळाडूंची जिद्द गौरवली.
क्रांती गौडने त्यांच्या भावाचा पंतप्रधानांविषयीचा उत्साह सांगितल्यावर मोदींनी “त्याला कधीही भेटीचे खुले आमंत्रण आहे,” असे म्हणत वातावरण प्रसन्न केले.
भारतीय महिला संघाच्या विजयानंतर देशभरात जल्लोष सुरू असताना पंतप्रधानांशी झालेली ही दिलखुलास भेट खेळाडूंसाठी संस्मरणीय ठरली.
