मुंबई प्रतिनिधी
मुंबई महानगरपालिकेच्या आगामी निवडणुकांकडे लक्ष वेधणारा महत्त्वाचा टप्पा सोमवारी (६ ऑक्टोबर) पार पडणार आहे. प्रभागांच्या भौगोलिक सीमांबाबतचा अंतिम आराखडा याच दिवशी जाहीर होणार असून, नागरिकांनी केलेल्या हरकती व सूचनांचा त्यात कितपत परावर्तित होणार याकडे सर्वांचे लक्ष लागले आहे.
महापालिकेने २२ ऑगस्ट रोजी जाहीर केलेल्या प्राथमिक आराखड्यावर एकूण ४९४ हरकती व सूचना दाखल झाल्या होत्या. त्यावर सप्टेंबर महिन्यात सलग तीन दिवस सुनावणी झाली. महाराष्ट्र शासनाने अतिरिक्त मुख्य सचिव (गृह) इक्बालसिंग चहल यांची प्राधिकृत अधिकारी म्हणून नियुक्ती केली होती. या सुनावणीनंतर अंतिम आराखडा १६ सप्टेंबरला राज्य सरकारकडे पाठवण्यात आला. त्यानंतर राज्य सरकारने निवडणूक आयोगाला हा आराखडा सुपूर्द केला होता. आयोगाने आता अंतिम प्रभाग रचना महानगरपालिकेकडे सादर करणार आहे.
मुंबईतील प्रभागांची संख्या २२७ इतकीच कायम ठेवण्यात आली आहे. २०१७ च्या निवडणुकीच्या वेळी जी रचना होती, त्यात मोठे बदल नसले तरी अनेक प्रभागांत सूक्ष्म स्तरावरील तक्रारी नोंदल्या गेल्या होत्या. एकाच इमारतीतील रहिवाशांना दोन वेगवेगळ्या प्रभागांत विभागले जाणे, रेल्वे मार्गाच्या एका बाजूला राहणाऱ्या वस्त्या दुसऱ्या बाजूच्या प्रभागात दाखवणे, अशा प्रकारच्या विसंगतींवर नागरिकांनी आक्षेप घेतले होते. या सर्व आक्षेपांचा अंतिम आराखड्यात विचार झाला आहे का, हे सोमवारी स्पष्ट होणार आहे.
राज्यातील स्थानिक स्वराज्य संस्थांच्या निवडणुका बराच काळ रखडल्या आहेत. त्यामुळे मुंबई महापालिकेचा प्रभाग आराखडा जाहीर होणे ही निवडणूक प्रक्रियेची दिशा ठरवणारी महत्त्वाची पायरी मानली जात आहे. अंतिम आराखडा जाहीर झाल्यानंतरच निवडणुकीचे वेळापत्रक जाहीर होण्याचा मार्ग मोकळा होईल.
