मुंबई प्रतिनिधी
राज्यातील जिल्हा परिषदांच्या अध्यक्ष पदांसाठी आरक्षण जाहीर झाल्यानंतर आता नगरपरिषदांच्या नगराध्यक्ष पदांच्या आरक्षणाची सोडत येत्या सोमवारी मंत्रालयात काढली जाणार आहे. मान्यताप्राप्त राष्ट्रीय आणि राज्य पक्षांच्या प्रतिनिधींना सोडतीवेळी उपस्थित राहण्यासाठी सूचना देण्यात आल्या आहेत. यामुळे दिवाळीनंतर स्थानिक स्वराज्य संस्थांच्या निवडणुकांना सुरूवात होणार असल्याचे स्पष्ट झाले आहे. निवडणूकपूर्व प्रशासकीय तयारीही वेगाने सुरू आहे.
जिल्हा परिषद व पंचायत समितींसाठी १३ ऑक्टोबरला सोडत
राज्यातील जिल्हा परिषद व पंचायत समित्यांच्या सार्वत्रिक निवडणुकांसाठी आरक्षण सोडतीची तारीख निश्चित करण्यात आली आहे. राज्य निवडणूक आयोगानुसार १३ ऑक्टोबर २०२५ रोजी ३२ जिल्हा परिषद आणि ३३६ पंचायत समित्यांच्या सदस्यपदासाठी आरक्षण सोडत काढली जाणार आहे. संबंधित जिल्हाधिकाऱ्यांकडून १० ऑक्टोबर रोजी यासंदर्भातील सूचना प्रसिद्ध केल्या जातील. १३ ऑक्टोबरला प्रारूप आरक्षण अधिसूचना जाहीर होईल. त्यावर १४ ते १७ ऑक्टोबरदरम्यान हरकती व सूचना दाखल करण्याची मुदत असणार आहे. सर्व हरकतींचा विचार करून ३ नोव्हेंबरला अंतिम आरक्षण अधिसूचना राजपत्रात प्रकाशित केली जाणार आहे.
२४७ नगरपरिषदा व ४२ नगरपंचायतींच्या निवडणुका
राज्यातील २४७ नगरपरिषदा व ४२ नगरपंचायतींसाठी निवडणुका होणार आहेत. या अनुषंगाने प्रभागनिहाय प्रारूप मतदार यादी ८ ऑक्टोबरला प्रसिद्ध केली जाणार आहे. त्यावर १३ ऑक्टोबरपर्यंत हरकती व सूचना दाखल करता येतील. त्यानंतर २८ ऑक्टोबरला अंतिम मतदार यादी प्रसिद्ध केली जाईल.
राज्य निवडणूक आयोगाने १ जुलै २०२५ हा अधिसूचित दिनांक निश्चित केला असून त्या दिवशी अस्तित्वात असलेली विधानसभा मतदार यादीच या निवडणुकांसाठी वापरण्यात येणार आहे. विधानसभा मतदारसंघाच्या याद्यांनुसारच प्रभागनिहाय मतदारांची नावे व पत्ते कायम ठेवले जातील. मात्र, या प्रक्रियेत नवीन नावांचा समावेश, नावे वगळणे अथवा पत्त्यात दुरुस्ती करण्याची तरतूद आयोगाकडून करण्यात आलेली नाही.
