मुंबई प्रतिनिधी
राज्यातील प्रवाशांच्या सोयीसाठी महाराष्ट्र राज्य मार्ग परिवहन महामंडळाने (MSRTC) “आपली एसटी” (Aapli ST) नावाचे नवे ॲप दसऱ्याच्या मुहूर्तावर सादर केले. या ॲपच्या मदतीने प्रवाशांना एसटी बसचे अचूक ठिकाण व वेळ कळणार असून प्रवास अधिक सुलभ, पारदर्शक व विश्वासार्ह होईल, असा विश्वास परिवहन मंत्री तथा एसटी महामंडळाचे अध्यक्ष प्रताप सरनाईक यांनी व्यक्त केला.
१२ हजारांहून अधिक बसेस व राज्यभरातील एक लाख मार्गांचे मॅपिंग करून हे ॲप विकसित करण्यात आले आहे. प्रवाशांना बस कोणत्या थांब्यावर केव्हा पोहोचेल याची रिअल-टाइम माहिती या ॲपमध्ये उपलब्ध होईल. थांब्यावर बसची अनिश्चित प्रतीक्षा करण्याची आता गरज नाही; बसचे लाईव्ह ट्रॅकिंग करून प्रवासी थेट योग्य वेळी थांब्यावर पोहोचू शकतील.
“रोजमाल्टा ऑटोटेक लि.”च्या सहाय्याने विकसित करण्यात आलेल्या या ॲपमधून जवळचे बसस्थानक शोधणे, दोन थांब्यांमधील बसचे वेळापत्रक पाहणे, आरक्षित तिकिटावरील सेवा क्रमांक टाकून बस ट्रॅक करणे आदी सुविधा उपलब्ध आहेत. शिवाय प्रवाशांच्या सुरक्षेच्या दृष्टीने आपत्कालीन क्रमांकांची यादीही देण्यात आली आहे. एका क्लिकवर मदतीसाठी कॉल करता येईल.
सध्या ॲपवर राज्यातील १२ हजारांहून अधिक बसेसचा डेटा उपलब्ध असून पुढील काळात सर्व बसेस यात समाविष्ट होतील. तसेच लवकरच एसटीच्या तिकीट बुकिंग ॲपमध्येही बसची थेट माहिती समाविष्ट केली जाणार आहे.
सरनाईक म्हणाले, “प्रवाशांना विश्वासार्ह आणि सुरक्षित सेवा देणे हे एसटीचे प्राधान्य आहे. आपली एसटी ॲप या दिशेने महत्त्वाचे पाऊल आहे. प्रवाशांकडून मिळणाऱ्या अभिप्रायानुसार ॲपमध्ये आणखी सुधारणा करण्यात येतील.”
सध्या हे ॲप MSRTC commuter app या नावाने गुगल प्ले स्टोअरवर उपलब्ध आहे. मात्र, लवकरच प्रवाशांना ते आपली एसटी या मराठमोळ्या नावानेच दिसणार असल्याचे जनसंपर्क अधिकारी अभिजीत भोसले यांनी स्पष्ट केले.
