नवी मुंबई प्रतिनिधी
नवी मुंबईतील कोपरखैरणे परिसरात प्रेमसंबंधातून निर्माण झालेल्या वादाने भयंकर वळण घेतले आहे. ब्रेकअप केल्याच्या रागातून एका तरुणाने आपल्या माजी प्रेयसीसह तिच्या सख्ख्या बहिणीवर पिस्तुलातून गोळ्या झाडल्याची धक्कादायक घटना गुरुवारी (५ नोव्हेंबर) रात्री घडली. सेक्टर १ मधील एसएस-३ परिसरात रात्री सुमारे ९.१५ वाजण्याच्या सुमारास हा थरार घडला. या हल्ल्यात २० वर्षीय तरुणीच्या पाठीत गोळी घुसली, तर तिच्या २२ वर्षीय बहिणीच्या कानाजवळून गोळी गेल्याने तीही जखमी झाली. या घटनेने संपूर्ण नवी मुंबईत खळबळ उडाली आहे. पोलिसांनी मुख्य आरोपी अर्जुन चव्हाण (२२) याला अटक केली असून, गोळीबारासाठी वापरलेले पिस्तूल अद्याप हस्तगत झाले नसल्याची माहिती समोर आली आहे.
घरातील पुरुष बाहेर जाताच हल्लेखोरांचा धुडगूस!
मिळालेल्या माहितीनुसार, कोपरखैरणे सेक्टर १ मधील एसएस-३ परिसरात धोबी कुटुंबीय वास्तव्यास आहेत. गुरुवारी रात्री तरुणीचे वडील आणि भाऊ कामानिमित्त घराबाहेर गेले होते. त्यावेळी घरात आई आणि दोन्ही बहिणी उपस्थित होत्या. रात्रीच्या सुमारास आरोपी अर्जुन चव्हाण तेथे आला. त्यानंतर दोन्ही बहिणींना लक्ष्य करून त्याने पिस्तुलातून गोळीबार केला. अचानक झालेल्या गोळीबारामुळे परिसरात एकच धावपळ उडाली. गोळ्यांच्या आवाजाने नागरिकांमध्ये भीतीचे वातावरण निर्माण झाले.
या हल्ल्यात २० वर्षीय तन्नू धोबी हिच्या पाठीत गोळी लागल्याने ती गंभीर जखमी झाली, तर तिची २२ वर्षीय बहीण रितू धोबी हिच्या कानाजवळून गोळी गेली. दोघींनाही तातडीने रुग्णालयात दाखल करण्यात आले. सुरुवातीला वाशी येथील नवी मुंबई महापालिकेच्या रुग्णालयात उपचार करण्यात आले. त्यानंतर गंभीर जखमी तरुणीला मुंबईतील जे. जे. रुग्णालयात हलविण्यात आल्याची माहिती आहे. ताज्या वृत्तानुसार, दोन्ही बहिणींची प्रकृती धोक्याबाहेर असल्याचे समजते.
प्रेमसंबंध संपविल्याचा राग; माजी प्रियकरानेच झाडल्या गोळ्या?
या गोळीबारामागे प्रेमसंबंधाची पार्श्वभूमी असल्याची माहिती तपासातून पुढे येत आहे. २० वर्षीय तरुणीचे आरोपी अर्जुन चव्हाण याच्यासोबत प्रेमसंबंध होते. मात्र, काही कारणांमुळे तिने हे संबंध संपविण्याचा निर्णय घेतला होता. त्याचाच राग मनात धरून आरोपीने हा जीवघेणा हल्ला केल्याचा प्राथमिक संशय व्यक्त केला जात आहे. विशेष म्हणजे, तरुणीच्या बहिणीलाही या हल्ल्याचा सामना करावा लागल्याने या घटनेचे गांभीर्य अधिक वाढले आहे. मात्र, हल्ल्यामागील नेमके कारण आणि पूर्वनियोजित कट होता का, याचा तपास पोलीस करीत आहेत.
आरोपी अटकेत; पिस्तूल हस्तगत करण्याचे आव्हान
घटनेची माहिती मिळताच कोपरखैरणे पोलिसांनी घटनास्थळी धाव घेत तपासाची चक्रे वेगाने फिरवली. मुख्य आरोपी अर्जुन चव्हाण याला पोलिसांनी अटक केली. गोळीबारासाठी वापरण्यात आलेले पिस्तूल अद्याप हस्तगत झालेले नसून, त्याचा शोध सुरू आहे. या प्रकरणात अन्य कोणाचा सहभाग आहे का, याचाही तपास केला जात आहे. आरोपीविरोधात खुनाचा प्रयत्न केल्याप्रकरणी गुन्हा दाखल करण्याची प्रक्रिया सुरू असल्याचे वृत्त आहे.
दरम्यान, जखमी तरुणीच्या भावाने दिलेल्या माहितीनुसार, वडील आणि तो घराबाहेर गेले असताना घरात आई आणि दोन्ही बहिणी होत्या. त्याचवेळी आलेल्या तरुणाने गोळीबार करून पळ काढला. या घटनेमुळे निवासी परिसरातील महिलांच्या सुरक्षिततेचा प्रश्न पुन्हा ऐरणीवर आला आहे.
प्रेमसंबंध संपविण्याचा निर्णय एखाद्या तरुणीचा वैयक्तिक अधिकार असताना, त्याचा राग मनात धरून तिच्या आणि तिच्या कुटुंबीयांच्या जीवावर उठण्यापर्यंत मजल जाणे ही गंभीर सामाजिक समस्या बनत चालली आहे. प्रेमाच्या नावाखाली सूड, धमक्या आणि हिंसाचाराचा मार्ग स्वीकारणाऱ्या प्रवृत्तींना आळा घालण्याचे मोठे आव्हान पोलिसांसमोर उभे राहिले आहे.
