नवी दिल्ली वृत्तसंस्था
तामिळनाडूच्या राजकारणात गेल्या काही दिवसांपासून सुरू असलेल्या सत्तासंघर्षावर अखेर पडदा पडताना दिसत आहे. अभिनेता विजय यांच्या नेतृत्वाखालील Tamilaga Vettri Kazhagam (TVK) ला बहुमतासाठी आवश्यक असलेले संख्याबळ मिळाल्याची माहिती समोर आली आहे. वामपंथी पक्ष तसेच विदुथलाई चिरुथैगल काची (VCK) यांनी विजय यांच्या पक्षाला पाठिंबा देण्याचा निर्णय घेतल्याने राज्यात TVKच्या नेतृत्वाखाली सरकार स्थापन होण्याची शक्यता अधिक बळकट झाली आहे.
#WATCH | Tamil Nadu: TVK workers and supporters celebrate outside the party headquarters in Chennai, amid reports of CPI, CPI(M) and VCK extending support to the party. pic.twitter.com/y4XOm222al
— ANI (@ANI) May 8, 2026
राज्यातील सत्तास्थापनेच्या घडामोडींना वेग आला असून, विजय लवकरच राज्यपालांची पुन्हा भेट घेणार असल्याचे सांगितले जात आहे. राज्यपालांसोबतची ही त्यांची तिसरी बैठक असणार असून, या वेळी सरकार स्थापनेचा दावा सादर केला जाऊ शकतो. याआधी बुधवारी आणि गुरुवारी झालेल्या बैठकींत कोणताही तोडगा निघाला नव्हता. मात्र, नव्या राजकीय समीकरणांमुळे आता परिस्थिती TVKच्या बाजूने झुकल्याचे चित्र आहे.
तामिळनाडू विधानसभा निवडणुकीत TVKने पहिल्याच प्रयत्नात उल्लेखनीय कामगिरी करत 107 जागा जिंकल्या होत्या. मात्र, स्पष्ट बहुमतासाठी आवश्यक असलेल्या 118 या आकड्यापासून पक्ष 11 जागांनी दूर होता. काँग्रेसच्या पाच आमदारांनी पाठिंबा जाहीर केल्यानंतरही विजय यांना बहुमतासाठी आणखी संख्याबळाची गरज होती. अखेर CPI, CPI(M) आणि VCK या पक्षांनी पाठिंबा देण्याची तयारी दर्शवल्यानंतर TVKचे संख्याबळ बहुमताच्या उंबरठ्यावर पोहोचले आहे.
राजकीय सूत्रांच्या माहितीनुसार, डाव्या पक्षांच्या पाठिंब्यामुळे विजय यांच्या नेतृत्वाखालील आघाडीला स्थैर्य मिळण्याची शक्यता आहे. चेन्नईतील TVK मुख्यालयाबाहेर कार्यकर्त्यांनी जल्लोष सुरू केला असून, ‘थलपती’ मुख्यमंत्री होणार असल्याच्या घोषणांनी परिसर दणाणून गेला आहे.
दरम्यान, TVK आणि All India Anna Dravida Munnetra Kazhagam (AIADMK) यांच्यातील चर्चाही सुरू असल्याचे समोर आले आहे. पुदुचेरीतील एका रिसॉर्टमध्ये दोन्ही पक्षांच्या नेत्यांमध्ये युती किंवा बाह्य पाठिंब्याबाबत चर्चा सुरू असल्याची माहिती मिळत आहे. त्यामुळे तामिळनाडूच्या सत्तासमीकरणात आणखी नाट्यमय घडामोडी होण्याची शक्यता नाकारता येत नाही.
पहिल्याच निवडणुकीत सर्वात मोठा पक्ष म्हणून उदयास आलेल्या TVKसमोर स्पष्ट बहुमताचा अडसर होता. मात्र, काँग्रेस आणि डाव्या पक्षांच्या पाठिंब्यानंतर विजय यांच्या नेतृत्वाखाली सरकार स्थापनेचा मार्ग जवळपास मोकळा झाल्याचे मानले जात आहे. आता राज्यपालांच्या भूमिकेकडे आणि पुढील राजकीय हालचालींकडे संपूर्ण देशाचे लक्ष लागले आहे.
पक्षनिहाय संख्याबळ
पक्ष जागा
TVK 107
काँग्रेस 05
CPI 02
CPI(M). 02
VCK. 02
एकूण. 118
