मुंबई प्रतिनिधी
आठवड्याच्या पहिल्याच दिवशी मुंबईकरांना दुहेरी धक्का बसला. मध्य रेल्वेच्या डोंबिवलीजवळ लोकलचे डबे रुळावरून घसरल्याने सकाळच्या गर्दीच्या वेळी वाहतूक विस्कळीत झाली; तर पनवेल रेल्वे स्थानक येथे प्रवाशांनी भरलेली लिफ्ट कोसळल्याची धक्कादायक घटना घडली. दोन्ही घटनांमुळे हजारो प्रवाशांना मोठा मनस्ताप सहन करावा लागला.
मिळालेल्या माहितीनुसार, सकाळी सुमारे साडेआठच्या सुमारास डोंबिवली स्थानकाजवळ डाऊन स्लो मार्गावर धावणाऱ्या लोकलचे तीन डबे रुळावरून घसरले. ही लोकल कल्याणच्या दिशेने जात होती. या घटनेमुळे डाऊन स्लो मार्गावरील वाहतूक पूर्णपणे ठप्प झाली. सकाळच्या गर्दीच्या वेळेत घडलेल्या या अपघातामुळे प्लॅटफॉर्मवर प्रवाशांची प्रचंड गर्दी उसळली आणि अनेकांना पर्यायी प्रवासाचा मार्ग शोधावा लागला.
सुदैवाने, या अपघातात कोणतीही जीवितहानी झालेली नाही. मात्र, रेल्वे सेवेत झालेल्या विलंबामुळे छत्रपती शिवाजी महाराज टर्मिनसकडे जाणाऱ्या गाड्यांवर मोठा परिणाम झाला. रेल्वे प्रशासनाने तातडीने बचाव व दुरुस्ती कार्य हाती घेतले असून, विस्कळीत सेवा पूर्ववत करण्याचे प्रयत्न सुरू असल्याचे अधिकाऱ्यांनी सांगितले.
दरम्यान, दुसऱ्या घटनेत नवी मुंबईतील पनवेल स्थानकाच्या प्लॅटफॉर्म क्रमांक ७ वरील लिफ्ट अचानक खाली कोसळली. त्या वेळी लिफ्टमध्ये चार प्रवासी अडकले होते. घटनेनंतर काही काळ स्थानक परिसरात भीती व गोंधळाचे वातावरण निर्माण झाले. तत्काळ बचाव पथकाने घटनास्थळी धाव घेत प्रवाशांना सुरक्षित बाहेर काढले. या दुर्घटनेतही कोणतीही जीवितहानी झालेली नसल्याची प्राथमिक माहिती आहे.
या सलग दोन घटनांमुळे मुंबईच्या ‘लाइफलाइन’ मानल्या जाणाऱ्या लोकल सेवेत सुरुवातीपासूनच अडथळे निर्माण झाले. आठवड्याच्या पहिल्या दिवशी कामावर जाणाऱ्या प्रवाशांना मोठा त्रास सहन करावा लागला. रेल्वे प्रशासनाकडून दोन्ही घटनांची चौकशी सुरू असून, तांत्रिक बिघाडाचे नेमके कारण शोधले जात आहे.
