मुंबई प्रतिनिधी
राज्यातील 246 नगरपरिषद आणि 42 नगरपंचायतींच्या निवडणूक प्रक्रियेला उंबरठ्यावर असतानाच मोठा बदल समोर आला आहे. 2 डिसेंबरला होणाऱ्या मतदानाआधीच बारामती, अंबरनाथसह तब्बल 14 नगरपरिषदांच्या निवडणुका पुढे ढकलण्यात आल्या आहेत. प्रचाराची शेवटची घडी सुरू असताना आलेल्या या निर्णयामुळे उमेदवार आणि पक्षांमध्ये प्रचंड संभ्रम निर्माण झाला आहे.
बारामती नगरपरिषदेसह महाबळेश्वर व फलटण या ठिकाणच्या निवडणुका स्थगित करण्यात आल्याची माहिती राज्य निवडणूक आयोगाने दिली. फलटण येथे 20 डिसेंबर तर महाबळेश्वर येथे 21 डिसेंबरला मतदान होणार आहे. निवडणूक प्रक्रियेतील त्रुटी, न्यायालयीन स्थगिती आणि उमेदवारी अर्जांवरील आक्षेप या पार्श्वभूमीवर हा निर्णय घेण्यात आला आहे.
बारामतीत उमेदवारी अर्ज भरण्याची वेळ दुपारी तीनची असतानाच प्रक्रिया पावणेतीनला बंद झाल्याचा मुद्दा समोर आला होता. काही उमेदवारांनी त्रुटींवर आक्षेप घेतल्याने प्रकरण न्यायालयात गेले. न्यायालयाने भाजपच्या दोन उमेदवारांना मुदत संपल्यानंतरही उमेदवारी अर्ज दाखल करण्याची परवानगी दिल्यानंतर निवडणूक आयोगाने परिस्थितीतील गुंतागुंत पाहता संपूर्ण प्रक्रिया पुढे ढकलण्याचा निर्णय घेतला. बारामतीतील नगराध्यक्षपदासह सात प्रभागांबाबत न्यायालयात दाखल याचिका फेटाळण्यात आल्या असल्या, तरी अपील करण्याची मुदत शिल्लक असल्याने आयोगाने वाद टाळण्याची भूमिका घेतली.
फलटण व महाबळेश्वरप्रमाणेच राज्यातील आणखी काही नगरपरिषदांमध्येही न्यायालयीन प्रक्रिया प्रलंबित असल्याने निवडणुका पुढे ढकलण्यात आल्या आहेत. कोपरगाव, देवळाली प्रवरा, नेवासा, पाथर्डी (अहिल्यानगर), मंगळवेढा (सोलापूर), बाळापूर, घुग्गूस (चंद्रपूर), अंजनगाव सुर्जी, मुखेड, धर्माबाद आणि अंबरनाथ या नगरपरिषदांचा यात समावेश आहे.
प्रचाराची धावपळ, बैठका, सभा, खर्च, सर्व काही अंतिम टप्प्यावर असतानाच झालेल्या या निर्णयाने उमेदवारांची समीकरणे ढवळून निघाली आहेत. नवीन तारखा जाहीर झाल्यानंतर पुन्हा एकदा प्रचारयुद्ध पेटणार यात शंका नाही.
