बिहार) वृत्तसंस्था
बिहारच्या समस्तीपूर जिल्ह्यातील सिंघिया घाटावर यंदाची ‘नाग पंचमी’ यात्रा एका वेगळ्याच उत्साहात पार पडली. या अनोख्या आणि धाडसी परंपरेत शेकडो भाविकांनी सापांना गळ्यात, हातात आणि अगदी डोक्यावर घेऊन मिरवणुकीत सहभाग घेतला. या दृश्यांचे व्हिडीओ सध्या सोशल मीडियावर चांगलेच व्हायरल होत असून, सापांभोवती फिरणाऱ्या या यात्रेची चांगलीच चर्चा रंगली आहे.
#बिहार #समस्तीपुर : विभूतिपुर प्रखंड के सिंधिया घाट मे नागपंचमी के मौके पर सांपों के अनोखे मेले का आयोजन किया गया।
रिपोर्ट-कृष्ण कुमार pic.twitter.com/TGjZQpKaKT
— आकाशवाणी समाचार, पटना (@airnews_patna) July 15, 2025
सिंघिया बाजारातून प्रारंभ, बुधी गंडक नदीपर्यंत मिरवणूक
दरवर्षीप्रमाणे यंदाही ही यात्रा सिंघिया बाजारातील मा भगवती मंदिरात प्रार्थनेनंतर सुरू झाली. तिथून बुधी गंडक नदीकडे निघालेल्या मिरवणुकीत लहानांपासून वृद्धांपर्यंत प्रत्येक भाविकाच्या अंगावर, हातात किंवा डोक्यावर साप दिसत होते. काहींनी तर काठ्यांवर गुंडाळून साप मिरवले. विशेष म्हणजे कोणत्याही भाविकाच्या चेहऱ्यावर भीतीचा लवलेशही नव्हता.
तोंडात साप धरून देखील दर्शन!
या यात्रेतील थरारक क्षणांमध्ये काही भाविकांनी तोंडात साप धरलेलेही व्हिडीओ समोर आले आहेत. हे दृश्य पाहणाऱ्यांच्या अंगावर अक्षरशः शहारा आला. मात्र, श्रद्धेच्या बळावर भाविकांनी हे धाडसही सहज पार पाडले.
सर्प देवी ‘माता विशहारी’ची आराधना
संपूर्ण यात्रेचा केंद्रबिंदू होता ‘माता विशहारी’ या स्थानिक सर्प देवीची आराधना. भाविक तिच्या नावाचा जयघोष करत, सापांसह पूजा-अर्चा करत पुढे सरकत होते. पूजा झाल्यानंतर हे साप नजीकच्या जंगलात साश्रुनयनांनी सोडण्यात आले.
शतकभराची परंपरा, पिढ्यानपिढ्या श्रद्धेचा वारसा
ही यात्रा केवळ समस्तीपूरपुरती मर्यादित नाही, तर खागरिया, सहारसा, बेगुसराय आणि मुजफ्फरपूरसारख्या मितिला भागातील जिल्ह्यांतूनही हजारो भाविक दरवर्षी येथे दाखल होतात. स्थानिक सांगतात की ही परंपरा तब्बल १०० वर्षांहून अधिक जुनी असून, ती अनेक पिढ्यांपासून अखंड चालू आहे.
स्त्रियांचीही विशेष पूजा; नागदेवतेकडे आरोग्य, समृद्धीची याचना
यात्रेच्या पार्श्वभूमीवर गहवरांमध्ये स्त्रियादेखील नागदेवतेची विशेष पूजा करतात. आपल्या कुटुंबासाठी आरोग्य, समृद्धी आणि संरक्षण यासाठी त्या देवीकडे साकडे घालतात. इच्छा पूर्ण झाल्यानंतर त्या पुन्हा नाग पंचमीच्या दिवशी मंदिरात येऊन प्रसाद अर्पण करतात.
निसर्ग, श्रद्धा आणि साहस यांचा मिलाफ
ही यात्रा केवळ श्रद्धेची नाही, तर निसर्गप्रेम, परंपरा आणि साहस यांचा अनोखा संगम ठरतो. अशा प्रकारे सर्पांसोबत निःसंकोचपणे सहभाग घेणारी ही यात्रा भारतातील अद्वितीय धार्मिक परंपरांपैकी एक मानली जाते.
