पुणे , सातारा प्रतिनिधी न्युज नेटवर्क
पुणे : स्वारगेट पोलीस वसाहतीत पोलीस कर्मचाऱ्याच्या पत्नीने गळफास घेऊन आत्महत्या केल्याची घटना शुक्रवारी घडली. आत्महत्येमागचे निश्चित कारण समजू शकले नाही. याप्रकरणी खडक पोलीस ठाण्यात अकस्मात मृत्यू अशी नोंद केली.
पोलिसांच्या माहितीनुसार, ज्योती बर्डे (वय १९) यांचे पती कैलास हे पुणे शहर पोलीस दलात नियुक्तीस आहेत. ज्योती या पतीसोबत स्वारगेट येथील कर्मचार्‍यासाठी असलेल्या शासकीय निवास्थानात राहत होत्या. शुक्रवारी (दि ६) दुपारी अडीचच्या सुमारास त्यांनी राहत्या घरी ओढणीच्या साह्याने गळफास घेतला. ज्योती यांनी जेव्हा गळफास घेतला तेव्हा त्यांचा भाऊ घरी होता. त्याने ज्योती यांना खाली उतरवले. याबाबत खडक पोलिसांना माहिती देण्यात आली. उपचारासाठी ज्योती यांना रुग्णलयात दाखल करण्यात आले. मात्र त्यांचा मृत्यू झाल्याचे डॉक्टरांनी सांगितले. नंतर त्यांचा मृतदेह ससून रुग्णालयात शवविच्छेदन करण्यासाठी पाठविण्यात आला.
घटनास्थळी खडक पोलीस ठाण्याचे वरिष्ठ निरीक्षक शशिकांत चव्हाण यांनी भेट दिली. पोलिसांना ज्योती यांनी आत्महत्या करण्यापूर्वी लिहलेली कोणतीही चिठ्ठी मिळून आलेली नाही. त्यामुळे त्यांनी आत्महत्या कोणत्या कारणातून केली हे मात्र समजू शकलेले नाही. पुढील तपास खडक पोलिस करीत आहेत.
