नवी मुंबई – वाशी मनपाच्या उद्यानात सेक्टर-१५ येथे पाण्याच्या टाकीत पडून एक आठ वर्षीय चिमुकल्याचा दुर्देवी मृत्यू झाला आहे.या घटनेची पोलिसांना माहिती मिळताच पोलिसांनी घटनास्थळी धावघेत नवीमुंबई पोलीस पुढील तपास करत आहेत.
शनिवारी दिवाळीचा पाडवा असल्याने लहान मुलांनी उद्याने फुलून गेली होती. वाशी सेक्टर१४ येथील पालवे उद्यानातही चिमुकल्यांची गर्दी होती. मात्र रात्री नऊ साडे नऊच्या सुमारास या गर्दीतील एक आठ वर्षीय मुलगा अचानक दिसेनासा झाला. त्याचा खूप शोध घेतला मात्र तो आढळून आला नाही. काही वेळाने शंका आल्याने उद्यानातील भूमिगत पाण्याच्या टाकीचे झाकण उघडे असल्याचे लक्षात आल्याने टाकीत पाहणी केली असता मुलगा आढळून आला. त्याला बाहेर काढून नजीकच्या खाजगी रुग्णालयात दाखल केले. तिथे त्याच्या पोटात गेलेले पाणी काढण्यात आले, मात्र तेथे अतिदक्षता विभाग नसल्याने त्याला मनपा रुग्णालयात हलविण्यात आले. तिथे डॉक्टरांनी त्याला मृत घोषित केले. अशी माहिती स्थानिक माजी नगरसेवक प्रकाश मोरे यांनी दिली. सदर माहितीला दुजोरा वाशी पोलिसांनी दिला आहे. या घटनेची नोंद अद्याप न झाल्याने नाव माहिती नाही असेही वाशी पोलिसांनी सांगितले.
