मुंबई प्रतिनिधी
अंधेरी पश्चिम येथील न्यू लिंक रोड परिसरात जाहिरात फलक स्पष्टपणे दिसावेत यासाठी तब्बल ६३ झाडांची बेकायदा छाटणी करण्यात आल्याचा धक्कादायक प्रकार उघडकीस आला आहे. पर्यावरण नियमांचे उल्लंघन करून करण्यात आलेल्या या छाटणीमुळे परिसरातील नागरिक आणि पर्यावरणप्रेमींमध्ये संतापाची लाट उसळली असून संबंधित जाहिरात कंपनीवर गुन्हा दाखल करण्याचे निर्देश प्रशासनाकडून देण्यात आले आहेत.
महापालिकेच्या उद्यान विभागाने केलेल्या प्राथमिक चौकशीत न्यू लिंक रोडलगत उभ्या असलेल्या अनेक वृक्षांच्या फांद्या मोठ्या प्रमाणात कापण्यात आल्याचे आढळून आले. विशेष म्हणजे या झाडांच्या फांद्या जाहिरात फलकांसमोर येत असल्याने फलकांची दृश्यमानता वाढवण्यासाठीच ही छाटणी करण्यात आल्याचा संशय व्यक्त केला जात आहे.
स्थानिक नागरिकांनी काही दिवसांपूर्वी झाडांची अचानक छाटणी झाल्याबाबत तक्रारी केल्यानंतर महापालिकेच्या अधिकाऱ्यांनी घटनास्थळी पाहणी केली. पाहणीत ६३ झाडांचे नुकसान झाल्याचे स्पष्ट झाले. संबंधित कामासाठी कोणतीही अधिकृत परवानगी घेण्यात आली नसल्याचेही तपासात समोर आले आहे.
महापालिकेच्या वृक्ष प्राधिकरणाच्या नियमांनुसार कोणत्याही झाडाची छाटणी करण्यासाठी पूर्वपरवानगी घेणे बंधनकारक असते. तसेच झाडांना हानी पोहोचेल अशा पद्धतीने फांद्या कापणे हा दंडनीय गुन्हा मानला जातो. मात्र या प्रकरणात नियमांना बगल देत मोठ्या प्रमाणात छाटणी करण्यात आल्याने प्रशासनाने गंभीर दखल घेतली आहे.
अधिकाऱ्यांच्या माहितीनुसार, संबंधित जाहिरात फलकांचे मालक आणि जाहिरात कंपनीची जबाबदारी निश्चित करण्याची प्रक्रिया सुरू करण्यात आली आहे. यासंदर्भात संबंधित कंपनीवर भारतीय न्याय संहिता तसेच महाराष्ट्र (नागरी क्षेत्र) वृक्ष संरक्षण आणि संवर्धन नियमांनुसार गुन्हा दाखल करण्याची कार्यवाही करण्यात येणार आहे.
दरम्यान, पर्यावरण कार्यकर्त्यांनी या घटनेचा निषेध करत दोषींवर कठोर कारवाईची मागणी केली आहे. शहरातील वाढत्या काँक्रीटीकरणामुळे आधीच हरितक्षेत्र कमी होत असताना जाहिरातींसाठी झाडांची छाटणी करणे ही अत्यंत गंभीर बाब असल्याचे त्यांनी म्हटले आहे. अशा घटनांमुळे पर्यावरणीय समतोल बिघडण्याबरोबरच नागरिकांच्या आरोग्यावरही परिणाम होऊ शकतो, असा इशाराही तज्ज्ञांनी दिला आहे.
महापालिका प्रशासनाने शहरातील सर्व जाहिरात फलकांची तपासणी करण्याचा निर्णय घेतला असून भविष्यात अशा प्रकारच्या घटना रोखण्यासाठी विशेष मोहीम राबविण्यात येणार असल्याचे सांगितले. तसेच झाडांची बेकायदा छाटणी अथवा तोड होत असल्याचे आढळल्यास नागरिकांनी तत्काळ प्रशासनाला माहिती द्यावी, असे आवाहन करण्यात आले आहे.
या प्रकरणामुळे मुंबईतील वृक्षसंवर्धनाचा प्रश्न पुन्हा एकदा ऐरणीवर आला असून जाहिरात व्यवसाय आणि पर्यावरण संरक्षण यांच्यातील संघर्ष अधोरेखित झाला आहे. आता संबंधित जाहिरात कंपनीविरोधात नेमकी कोणती कारवाई होते, याकडे सर्वांचे लक्ष लागले आहे.
