सातारा प्रतिनिधी
शिवतर गावात प्रेमाच्या नावाखाली काळीज हादरवणारी घटना घडली आहे. अनैतिक संबंधात अडकलेल्या प्रेयसीने पळून जाऊन लग्न करण्यास नकार दिला, आणि याच रागातून प्रियकराने थेट तिचा जीव घेतला. खून करून पसार झालेल्या आरोपीस केवळ आठ तासांत पोलिसांनी जेरबंद केल्याने सातारा पोलिसांच्या जलद कारवाईचे सर्वत्र कौतुक होत आहे.
प्रेमात गुंतले, पण…
शिवतर (ता. सातारा) येथील पूजा प्रथमेश जाधव (वय २७) ही विवाहित महिला गेल्या सहा वर्षांपासून गावातीलच एका तरुणासोबत अनैतिक संबंधात होती. या प्रेमसंबंधात वाढ होत गेली तशी अपेक्षाही वाढत गेली. अखेर प्रियकराने तिला पळून जाऊन लग्न करण्याचा प्रस्ताव दिला. मात्र, पूजाने या प्रस्तावाला ठाम नकार दिला. हाच नकार तिच्या मृत्यूचे कारण ठरला.
घरात घुसून थेट हल्ला
गुरुवारी (७ जुलै) दुपारी १२ ते ३.३० च्या दरम्यान, आरोपी थेट पूजाच्या राहत्या घरात घुसला आणि धारदार शस्त्राने तिच्या गळ्यावर वार करत तिचा निर्घृण खून केला. घटनास्थळावरून आरोपी फरार झाला. या घटनेनंतर शिवतर गावात एकच खळबळ उडाली असून, परिसरात भीतीचे वातावरण पसरले आहे.
पोलिसांची धावपळ आणि यशस्वी सापळा
घटनेची माहिती मिळताच सातारा तालुका पोलिसांनी तातडीने घटनास्थळी धाव घेतली. गुन्हे प्रकटीकरण शाखेच्या पथकाने तांत्रिक विश्लेषण, मोबाईल टॉवर डेटा आणि गोपनीय माहितीच्या आधारे आरोपीचा शोध सुरू केला. आरोपी पुण्यातील स्वारगेट भागात असल्याची माहिती मिळताच पोलिसांनी त्वरित सापळा रचून त्याला अटक केली.
फक्त ८ तासांत गुन्ह्याचा उलगडा!
सातारा तालुका पोलिसांनी अवघ्या ८ तासांत आरोपीला अटक करून गुन्हा उघडकीस आणला आहे. या जलद कारवाईमुळे सातारा पोलिसांच्या कार्यक्षमतेचे सर्वत्र कौतुक होत असून, पोलिस दलाच्या भक्कम तपास यंत्रणेवर जनतेचा विश्वास अधिक दृढ झाला आहे.
हा खून केवळ प्रेमभंगातून नव्हे, तर समाजातील बिघडलेल्या नातेसंबंधांच्या भीषण वास्तवाचे दर्शन घडवतो, असा सूर आता स्थानिकांमध्ये उमटत आहे.
