मुंबई प्रतिनिधी
राज्य सरकारने इलेक्ट्रिक बाइक टॅक्सी (ई-बाइक टॅक्सी) सेवेला परवानगी देणारा शासन निर्णय जारी केला आहे. एक लाखाहून अधिक लोकसंख्या असलेल्या शहरांमध्ये ही सेवा सुरू होणार असून मुंबईसह इतर मोठ्या शहरांमध्ये या जून 2025 अखेरीस ई-बाइक टॅक्सी धावणार आहेत.
परिवहन विभागाने यासाठी नियमावली तयार केली असून ती लवकरच प्रसिद्ध होईल. त्यानंतर परवाने वितरित करून ही सेवा कार्यान्वित होईल.
नियमावलीची प्रक्रिया
ई-बाइक टॅक्सी सेवेची नियमावली या आठवड्यात प्रसिद्ध होईल. यानंतर नागरिकांकडून सूचना आणि हरकती मागवल्या जातील. परिवहन विभागाला या सूचनांवर विचार करून कायदेशीर बाबी तपासाव्या लागतील. यासाठी काही आठवड्यांचा कालावधी लागू शकतो. या प्रक्रियेनंतर नियमावली अंतिम होऊन परवाना वितरणाला सुरुवात होईल.
ई-बाइक टॅक्सी चालकांसाठी नियम
ई-बाइक टॅक्सी चालकांना वैध ड्रायव्हिंग लायसन्स आणि ट्रान्स्पोर्ट बॅज अनिवार्य असेल. चालकांचे वय 20 ते 50 वर्षे दरम्यान असावे आणि कामाचे तास जास्तीत जास्त 8 तास मर्यादित असतील. यामुळे चालकांची सुरक्षितता आणि कार्यक्षमता सुनिश्चित होईल. परवाने मोटार वाहन नियम 1989 अंतर्गत 5 वर्षांसाठी दिले जातील.
तक्रारी नोंदवण्यासाठी यंत्रणा
नियमावलीत ई-बाइकचा रंग, त्यावर लिहिलेली माहिती, नोंदणी प्रक्रिया, आणि नोंदणी शुल्क यांचा समावेश असेल. तसेच, प्रवाशांच्या तक्रारी नोंदवण्यासाठी यंत्रणा आणि प्रक्रिया निश्चित केली जाईल. ॲग्रिगेटर्स कडे किमान 50 ई-बाइक असणे आवश्यक आहे आणि त्यांना कमिशन आकारणीवर बंदी असेल.
प्रवाशांच्या सुरक्षेसाठी कठोर नियम
प्रवाशांच्या सुरक्षेसाठी कठोर नियम लागू करण्यात येणार आहे. केवळ 12 वर्षांवरील प्रवाशांना बाइक टॅक्सीने प्रवासाची परवानगी असेल. महिलांच्या सुरक्षेसाठी चालक आणि प्रवासी यांच्यामध्ये विभाजक अनिवार्य असेल. पावसाळ्यात सुरक्षा कवच आणि प्रवाशांच्या गोपनीयतेची काळजी घेणे बंधनकारक आहे. प्रत्येक ट्रिपचे कमाल अंतर 15 किलोमीटर असेल. चालक शहरात दररोज जास्तीत जास्त 4 राइड्स आणि शहराबाहेर 2 राइड्स देऊ शकतील.
