४५ वर्षांनंतर देसाई गटाची जिल्हा बँकेत एन्ट्री
सातारा प्रतिनिधी
सातारा जिल्ह्याच्या सहकार आणि राजकारणात महत्त्वपूर्ण मानल्या जाणाऱ्या जिल्हा मध्यवर्ती सहकारी बँकेच्या निवडणुकीत मोठा राजकीय उलटफेर झाला आहे. पाटण सोसायटी मतदारसंघातील प्रतिष्ठेच्या लढतीत साताऱ्याचे पालकमंत्री तथा शिवसेना नेते शंभूराज देसाई यांनी भाजपचे नेते आणि विद्यमान संचालक सत्यजितसिंह पाटणकर यांचा पराभव करत दणदणीत विजय मिळवला आहे. देसाई यांना ५८ मते मिळाली, तर पाटणकर यांना ४६ मतांवर समाधान मानावे लागले. तब्बल १२ मतांच्या फरकाने विजय मिळवत देसाई यांनी जिल्हा बँकेत संचालक म्हणून प्रवेश निश्चित केला आहे.
या निकालामुळे केवळ पाटण तालुक्यातील राजकीय समीकरणेच बदलली नाहीत, तर जिल्हा बँकेतील सत्तासमीकरणांच्या दृष्टीनेही या विजयाला विशेष महत्त्व प्राप्त झाले आहे. गेल्या अनेक वर्षांपासून पाटण तालुक्याच्या राजकारणात वर्चस्व राखणाऱ्या देसाईंनी आता सहकार क्षेत्रातही आपली ताकद दाखवून दिली आहे.
४५ वर्षांची प्रतीक्षा संपली!
या विजयाचे आणखी एक वैशिष्ट्य म्हणजे जवळपास ४५ वर्षांनंतर देसाई गटाचा प्रतिनिधी सातारा जिल्हा बँकेच्या संचालक मंडळात प्रवेश करणार आहे. पाटण तालुक्यातील राजकीय वर्चस्व असूनही जिल्हा बँकेच्या सहकार क्षेत्रात देसाई गटाला अपेक्षित यश मिळत नव्हते. मात्र, यावेळी योग्य राजकीय गणिते जुळवत आणि मतांची प्रभावी जुळवाजुळव करत देसाईंनी ही कोंडी फोडली आहे.
विशेष म्हणजे, मागील निवडणुकीतील पराभवाचा वचपा काढत त्यांनी यावेळी पाटणकरांना पराभवाचा धक्का दिला. त्यामुळे हा विजय देसाई यांच्यासाठी राजकीय प्रतिष्ठेचा ठरला आहे.
देसाई-पाटणकर संघर्षाची जिल्हाभर चर्चा
पाटण तालुक्यातील राजकारणात शंभूराज देसाई आणि सत्यजितसिंह पाटणकर हे पारंपरिक राजकीय प्रतिस्पर्धी म्हणून ओळखले जातात. जिल्हा बँकेच्या निवडणुकीत दोन्ही नेत्यांची प्रतिष्ठा पणाला लागली होती. पाटण तालुक्यातील राजकीय ताकद एका बाजूला, तर सहकार क्षेत्रातील पाटणकरांचे प्रस्थ दुसऱ्या बाजूला, अशी या लढतीची परिस्थिती होती.
दोन्ही बाजूंनी विजयासाठी जोरदार मोर्चेबांधणी केली होती. मतदारांशी संपर्क, राजकीय समीकरणांची जुळवाजुळव आणि पडद्यामागील हालचालींना वेग आला होता. त्यामुळे या लढतीचा निकाल काय लागणार, याकडे संपूर्ण जिल्ह्याचे लक्ष लागले होते. अखेर मतमोजणीत देसाईंनी बाजी मारली.
मकरंद पाटील यांच्या साथीचीही चर्चा
या निवडणुकीत बेरजेचे राजकारण करताना देसाईंना मंत्री मकरंद पाटील यांची समर्थ साथ लाभल्याची राजकीय वर्तुळात चर्चा आहे. विविध राजकीय गटांतील मतांची जुळवाजुळव आणि निवडणुकीपूर्वीची रणनीती यामुळे देसाईंना विजयाचा मार्ग सुकर झाल्याचे मानले जात आहे.
निकाल जाहीर होताच गुलालाची उधळण
मंगळवारी (३ नोव्हेंबर) सकाळपासून सातारा येथे जिल्हा बँकेच्या निवडणुकीची मतमोजणी सुरू होती. पाटण सोसायटी मतदारसंघाचा निकाल जाहीर होताच देसाई समर्थकांनी एकच जल्लोष केला. गुलालाची उधळण, फटाक्यांची आतषबाजी आणि विजयाच्या घोषणांनी परिसर दणाणून गेला.
दरम्यान, सातारा जिल्हा मध्यवर्ती सहकारी बँकेच्या एकूण २१ जागांपैकी नऊ जागा यापूर्वीच बिनविरोध झाल्या होत्या. उर्वरित १२ जागांसाठी १ नोव्हेंबर रोजी मतदान झाले होते. या निवडणुकीत सुमारे ९७.९२ टक्के मतदानाची नोंद झाली होती.
दरम्यान, पाटणमधील विजयामुळे पालकमंत्री शंभूराज देसाई यांनी राजकीय ताकदीसोबतच सहकार क्षेत्रातील आपले स्थानही अधोरेखित केले आहे. भाजपचे विद्यमान संचालक सत्यजितसिंह पाटणकर यांचा झालेला पराभव हा जिल्ह्यातील महायुतीतील राजकीय समीकरणांच्या दृष्टीनेही चर्चेचा विषय ठरला आहे.
एकूणच, पाटणच्या राजकारणातील वर्चस्वानंतर आता जिल्हा बँकेच्या सहकार क्षेत्रातही शंभूराज देसाई यांनी आपली ताकद सिद्ध केली आहे. हा विजय आगामी जिल्ह्यातील राजकीय समीकरणांवर कितपत परिणाम करणार, याकडे आता राजकीय वर्तुळाचे लक्ष लागले आहे.
