मुंबई प्रतिनिधी
कौटुंबिक हिंसाचार प्रकरणी वांद्रे येथील कौटुंबीक न्यायालयाने मंत्री धनंजय मुंडे यांना दोषी ठरविले आहे. करूणा शर्मा यांनी केलेले आरोप कोर्टाने अंशतः मान्य केले.
तसेच धनंजय मुंडेंना करूणा यांना दर महिन्याला दोन लाखांची पोटगी देण्याचे आदेश दिले. मात्र, वांद्र कोर्टानेपोटगीबाबतदिलेला निकाल करुणा शर्मांना मान्य नाही. त्यांनी याविरोधात हायकोर्टात दाद मागणार असल्याचे म्हटले आहे.
करूणा शर्मा यांनी आज माध्यमांशी संवाद साधला. यावेळी बोलतांना त्या म्हणाल्या की, मला पोटगी मिळाली हा माझा विजय आहे. मी कोर्टाचे खूप आभारी आहे. यापूर्वीही औरंगाबाद न्यायालयात माझा विजय झाला होता. आजही निकाल माझ्या बाजूने आला आहे. कोर्टाने मला बायको म्हणून मान्यता दिली. पण, कोर्टाचा हा निकाल मला मान्य नाही. मला पोटगी म्हणून १५ लाख रुपये हवे आहेत. १ लाख ७० हजार रुपये घराचं भाडं आहे. हे भाडे दिले जात नाही. देखभालीचा खर्च दरमहा ३० हजार आहे. दोन लाखांत काय होणार आहे? असा सवाल करुणा शर्मांनी केला.
माझी मुले माझ्यासोबत आहेत, त्यामुळं तिघांना ५-५ लाख असे १५ लाख रुपये मिळावे, अशी माझी मागणी होती. पण, न्यायालयाने २ लाख रुपये पोटगी देण्याचे आदेश दिले. मी या निर्णयाविरोधात हाय कोर्टात दाद मागणार आहे, असंही त्या म्हणाल्या.
पुढं त्या म्हणाल्या की, मला तुरुंगात टाकल्यापासून माझ्या बहिण आणि भावाने माझा नंबर ब्लॉक केलाय. मी एकटीच लढत आहे. मी तीन वर्षांपासून एकटीच लढत आहे. आई असती तर माझ्यावर ही वेळ कधीच आली नसती, असंही करुणा शर्मा म्हणाल्या.
