सुरत प्रतिनिधी
गुजरातमधील सुरत जिल्ह्यात सोमवारी सायंकाळी झालेल्या भीषण रस्ते अपघातात किमान आठ प्रवाशांचा मृत्यू झाल्याची प्राथमिक माहिती समोर आली आहे. बारडोली तालुक्यातील उवा गावाजवळ महाराष्ट्रातील दोन प्रवासी लक्झरी बसेसची समोरासमोर जोरदार धडक झाली. धडकेनंतर एका बसने रस्त्यावर उलटून पेट घेतल्याने दुर्घटनेचे स्वरूप अधिक भीषण बनले. या अपघातात अनेक प्रवासी गंभीर जखमी झाले असून त्यांच्यावर विविध रुग्णालयांत उपचार सुरू आहेत.
मिळालेल्या माहितीनुसार, महाराष्ट्रातून प्रवासी घेऊन जाणाऱ्या दोन खासगी लक्झरी बसेस उवा गावाजवळून जात असताना त्यांची समोरासमोर धडक झाली. अपघाताचा जोर इतका प्रचंड होता की एका बसचा पुढील भाग अक्षरशः चक्काचूर झाला. धडकेनंतर एक बस नियंत्रणाबाहेर जाऊन रस्त्यावर उलटली. त्यानंतर काही क्षणांतच बसला आग लागली आणि आगीने वेगाने संपूर्ण वाहनाला वेढले.
अपघातानंतर परिसरात एकच गोंधळ उडाला. बसमधील प्रवाशांच्या किंचाळ्यांनी परिसर दणाणून गेला. स्थानिक नागरिकांनी तत्काळ घटनास्थळी धाव घेत बचावकार्य सुरू केले. काही प्रवाशांना बसमधून बाहेर काढण्यात यश आले; मात्र आगीचा वेग वाढल्याने अनेकांना अडकून पडावे लागल्याची भीती व्यक्त केली जात आहे.
घटनेची माहिती मिळताच पोलीस, अग्निशमन दल आणि आपत्कालीन बचाव पथके घटनास्थळी दाखल झाली. अग्निशमन दलाच्या जवानांनी आगीवर नियंत्रण मिळवण्यासाठी शर्थीचे प्रयत्न केले. जखमींना तातडीने बारडोली व सुरत येथील रुग्णालयांत दाखल करण्यात आले. काही जखमींची प्रकृती चिंताजनक असल्याने मृतांचा आकडा वाढण्याची शक्यता प्रशासनाकडून व्यक्त करण्यात येत आहे.
प्राथमिक तपासात बसचालकांचे नियंत्रण सुटल्याने हा अपघात घडल्याचा अंदाज व्यक्त करण्यात येत असला, तरी नेमके कारण अद्याप स्पष्ट झालेले नाही. पोलिसांनी घटनास्थळाचा पंचनामा करून अपघाताचा सखोल तपास सुरू केला आहे. तसेच दोन्ही बसमधील प्रवाशांची ओळख पटविण्याचे कामही युद्धपातळीवर सुरू आहे.
या भीषण दुर्घटनेमुळे सुरत-बारडोली मार्गावरील वाहतूक काही काळ विस्कळीत झाली होती. अपघातग्रस्त वाहनांचे अवशेष हटविल्यानंतर वाहतूक पूर्ववत करण्यात आली. दरम्यान, मृतांच्या कुटुंबीयांवर शोककळा पसरली असून जखमींवर सर्वोत्तम उपचार करण्याच्या सूचना स्थानिक प्रशासनाने दिल्या आहेत.
