मुंबई प्रतिनिधी
मुंबईची ‘लाईफलाईन’ मानल्या जाणाऱ्या उपनगरीय लोकल सेवेत पुन्हा एकदा प्रवाशांच्या सुरक्षेचा गंभीर प्रश्न समोर आला आहे. दादर रेल्वे स्थानकात शुक्रवारी संध्याकाळच्या गर्दीच्या वेळी लोकलवर दगडफेक झाल्याची धक्कादायक घटना घडली. या दगडफेकीत महिला डब्यात उभ्या असलेल्या एका महिला प्रवाशाच्या डोळ्याला गंभीर दुखापत झाली असून त्यांना तातडीने रुग्णालयात दाखल करण्यात आले आहे.
गर्दीच्या वेळी आणि मुंबईतील सर्वाधिक वर्दळीच्या स्थानकांपैकी एक असलेल्या दादरमध्ये घडलेल्या या प्रकारामुळे महिला प्रवाशांमध्ये भीतीचे वातावरण पसरले आहे. या घटनेनंतर रेल्वे प्रशासनाच्या सुरक्षा व्यवस्थेवरही प्रश्नचिन्ह उपस्थित केले जात आहे.
स्टेशनमध्ये प्रवेश करताना दगडफेक
मिळालेल्या माहितीनुसार, छत्रपती शिवाजी महाराज टर्मिनस (CSMT) येथून बदलापूरच्या दिशेने जाणारी सायंकाळी ७.१४ वाजताची लोकल दादर रेल्वे स्थानकात प्रवेश करत असताना ही घटना घडली.
लोकल स्टेशनमध्ये शिरत असतानाच एका अज्ञात व्यक्तीने महिला डब्याच्या दिशेने जोरात दगड भिरकावला. हा दगड थेट डब्यात उभ्या असलेल्या एका महिला प्रवाशाला लागला. अचानक झालेल्या या प्रकारामुळे डब्यातील महिला प्रवाशांमध्ये काही क्षणातच एकच गोंधळ उडाला.
डोळ्याला गंभीर इजा
प्राथमिक माहितीनुसार जखमी महिला डब्याच्या दरवाजाजवळ उभी होती. दगड थेट तिच्या उजव्या डोळ्याच्या खालच्या भागावर लागल्याने डोळा आणि चेहऱ्याला गंभीर दुखापत झाली. त्यातून मोठ्या प्रमाणावर रक्तस्त्राव सुरू झाला.
घटनेनंतर डब्यातील इतर महिला प्रवाशांनी आरडाओरडा केला. लोकल दादर स्टेशनवर थांबताच रेल्वे पोलीस आणि स्थानकावरील कर्मचाऱ्यांनी तत्काळ घटनास्थळी धाव घेतली.
प्रथमोपचारानंतर रुग्णालयात हलवले
जखमी महिलेला तातडीने डब्यातून खाली उतरवून दादर रेल्वे स्थानकावरील प्रथमोपचार केंद्रात नेण्यात आले. तेथे प्राथमिक उपचार केल्यानंतर अधिक उपचारासाठी जवळच्या रुग्णालयात हलवण्यात आले.
घटनेनंतर काही काळ स्थानक परिसरात तणावाचे वातावरण निर्माण झाले होते. अनेक प्रवाशांनी या प्रकाराबद्दल संताप व्यक्त केला.
आरोपीचा शोध सुरू
या घटनेनंतर रेल्वे पोलिसांनी तपासाची चक्रे वेगाने फिरवली आहेत. दादर स्थानक आणि आसपासच्या परिसरातील सीसीटीव्ही फुटेज तपासले जात असून दगडफेक करणाऱ्या संशयित व्यक्तीचा शोध घेतला जात आहे.
गर्दीच्या वेळी दादरसारख्या गजबजलेल्या स्थानकात अशा प्रकारे दगडफेक होणे अत्यंत धोकादायक असल्याची प्रतिक्रिया प्रवाशांनी दिली आहे. वारंवार लोकलवर दगडफेक होण्याच्या घटनांमुळे रेल्वे प्रशासनाच्या सुरक्षा व्यवस्थेवर पुन्हा एकदा प्रश्नचिन्ह उपस्थित झाले आहे.
प्रवाशांनी अशा प्रकार करणाऱ्यांवर कठोर कारवाई करण्याची मागणी करत लोकलमधील सुरक्षा व्यवस्था अधिक मजबूत करण्याची गरज व्यक्त केली आहे.
