मुंबई प्रतिनिधी
राज्य परिवहन विभागाने एस.टी. कर्मचाऱ्यांसाठी महत्त्वाचा दिलासा देणारा निर्णय घेतला असून, महाराष्ट्र राज्य मार्ग परिवहन महामंडळाच्या (एसटी) सेवानिवृत्त कर्मचाऱ्यांना आता त्यांच्या पत्नीसह वर्षभर मोफत एसटी प्रवासाची सुविधा उपलब्ध करून देण्यात येणार आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांनी विधानभवनात झालेल्या महत्त्वपूर्ण बैठकीत ही माहिती दिली.
एसटी कर्मचाऱ्यांच्या विविध प्रलंबित प्रश्नांवर तोडगा काढण्यासाठी आयोजित करण्यात आलेल्या या बैठकीत कर्मचारी संघटनांच्या प्रतिनिधींनी अनेक मुद्दे मांडले. विशेषतः चालक-वाहकांवरील कारवाई, आगार व्यवस्थापनातील अडचणी, तसेच प्रशासकीय प्रक्रियांमुळे निर्माण होणाऱ्या समस्या याबाबत सविस्तर चर्चा झाली. या सर्व मागण्यांवर सकारात्मक तोडगा काढण्याचा प्रयत्न केला जाईल, असे आश्वासन मंत्री सरनाईक यांनी दिले.
बैठकीत घेतलेल्या महत्त्वाच्या निर्णयानुसार, एसटी महामंडळात आयुष्यभर सेवा बजावलेल्या सेवानिवृत्त कर्मचाऱ्यांना त्यांच्या पत्नीसह वर्षभर राज्यभर एसटी बसने मोफत प्रवास करता येणार आहे. हा निर्णय एसटी कर्मचाऱ्यांच्या दीर्घकाळापासूनच्या मागणीची पूर्तता करणारा असल्याचे मानले जात आहे. या सुविधेची अंमलबजावणी टप्प्याटप्प्याने करण्यासाठी प्रशासनाला आवश्यक निर्देश देण्यात आले असल्याची माहितीही मंत्री सरनाईक यांनी दिली.
बैठकीत सदाभाऊ खोत यांच्या नेतृत्वाखालील सेवा शक्ती संघर्ष एसटी कर्मचारी संघाच्या पदाधिकाऱ्यांनी विविध प्रश्न मांडले. चालक-वाहकांवर होणाऱ्या कारवाईबाबत अधिक पारदर्शक आणि न्याय्य भूमिका घेण्याची मागणी करण्यात आली. तसेच आगारांमधील व्यवस्थापन सुधारावे, कर्मचारी अडचणींचे तातडीने निराकरण व्हावे आणि अनावश्यक प्रशासकीय अडथळे दूर करावेत, अशी मागणी संघटनेने केली.
या सर्व मुद्द्यांवर सकारात्मक चर्चा झाली असून, एसटी महामंडळ कर्मचाऱ्यांच्या हितासाठी संवेदनशील आहे, असे स्पष्ट करताना मंत्री सरनाईक म्हणाले की, “कर्मचाऱ्यांना न्याय मिळावा आणि प्रवाशांना अधिक चांगली सेवा मिळावी, यासाठी प्रशासनाने समन्वयाने काम करणे आवश्यक आहे.”
विधानभवनातील दालनात झालेल्या या बैठकीत एसटी महामंडळाचे कामकाज अधिक पारदर्शक, कार्यक्षम आणि प्रवासी तसेच कर्मचारी हिताचे करण्यावर विशेष भर देण्यात आला. एसटी ही राज्यातील सामान्य जनतेची जीवनवाहिनी असून तिचे बळकटीकरण करण्यासाठी शासन कटिबद्ध असल्याचेही मंत्री सरनाईक यांनी नमूद केले.
या बैठकीस एसटी महामंडळाचे उपाध्यक्ष व व्यवस्थापकीय संचालक माधव कुसेकर यांच्यासह महामंडळाचे सर्व खातेप्रमुख उपस्थित होते.
