मुंबई:प्रतिनिधी
मुंबईतील कुर्ल्यात भीषण आगीची घटना घडली आहे. कुर्ल्यातील एलबीएस मार्गावरील एका हॉटेलला भीषण आग लागली आहे. आग लागल्याची माहिती मिळताच अग्निशमन दलाच्या ५ गाड्या घटनास्थळी पोहोचल्या आहेत. या आगीच्या घटनेनंतर परिसरात एकच खळबळ उडाली आहे.
कुर्ला पश्चिमेकडील लालबहादूर शास्त्री मार्गावर कल्पना टॉकीजच्या समोर असलेल्या रंगून जायका ढाबा या हॉटेलमध्ये भीषण आग लागली. रात्री सव्वा नऊच्या सुमारास लागलेली ही आग काही वेळातच भडकली असून आगीची तीव्रता पाहता अग्निशमन दलाने रात्री सव्वा नऊ वाजता आग स्तर-१ ची असल्याचे जाहीर केले. एलबीएस मार्गावरून वाहनांची सतत वर्दळ सुरू असते. तसेच या मार्गावर अनेक ढाबे एकमेकांना खेटून आहेत. त्यामुळे घटनेचे गांभीर्य वाढले आहे. घटनास्थळी पालिका विभाग कार्यालयाचे पथक, अग्निशमन दलाचे पथक, चार फायर इंजिन, तीन पाण्याचे ट्रॅंकर, पोलीस, विद्युत वितरण कंपनीचे पथक जमले आहे. आग विझवण्याचे काम रात्री उशीरपर्यंत सुरु होते. आगीत कोणी जखमी आहे किंवा नाही याबाबत अद्याप माहिती उपलब्ध झालेली नाही.
