कल्याण प्रतिनिधी
कल्याण : शहरातील बारावे गाव परिसरात घडलेल्या अमानुष घटनेने सर्वत्र खळबळ उडाली आहे. एका १५ वर्षीय अल्पवयीन मुलीच्या अनैतिक संबंधातून जन्मलेल्या नवजात बालिकेला कचऱ्याच्या कुंडीत फेकण्यात आल्याचा प्रकार उघडकीस आला. खडकपाडा पोलिसांनी या प्रकरणात आरोपी तरुणाला अटक केली आहे.
पोलिसांनी दिलेल्या माहितीनुसार, २२ वर्षीय रोहीत प्रदीप पांडे या तरुणाचे अल्पवयीन मुलीशी प्रेमसंबंध होते. या संबंधातून मुलगी गर्भवती राहिली. तिने एका बालिकेला जन्म दिला. मात्र पालकत्व लपविण्याच्या हेतूने नवजात बालिकेला कचऱ्याच्या कुंडीत टाकण्यात आले.
१७ ऑगस्ट रोजी पहाटेच्या सुमारास बारावे गावातील शिवमंदिराजवळ बाळाच्या रडण्याचा आवाज ऐकून ग्रामस्थांनी पोलिसांना माहिती दिली. खडकपाडा पोलिसांनी तातडीने घटनास्थळी धाव घेत नवजात बालिकेला ताब्यात घेतले. बालिकेला डोंबिवलीतील शास्त्रीनगर रुग्णालयात दाखल करण्यात आले असून तिची प्रकृती स्थिर असल्याचे डॉक्टरांनी सांगितले.
दरम्यान, तपास अधिकाऱ्यांनी तांत्रिक विश्लेषणाच्या आधारे अल्पवयीन मुलगी व आरोपी रोहित पांडे यांना शोधून काढले. मुलीने पोलिसांपुढे कबुली दिल्यानंतर रोहितला अटक करण्यात आली. संबंधित तरुणावर पोक्सो कायद्यासह भारतीय दंड विधानातील विविध कलमांखाली गुन्हा दाखल करण्यात आला आहे.
अल्पवयीन आईला सध्या ठाणे सिव्हील रुग्णालयात उपचार सुरू आहेत. प्रसूतीनंतर रक्तस्त्राव झाल्याने तिची प्रकृती बिघडली होती; मात्र सध्या ती स्थिर आहे. या प्रकरणात आरोपी तरुणासह त्याचे पालक आणि मुलीच्या आजीविरुद्धही कारवाई केली जाणार असल्याचे पोलिसांनी स्पष्ट केले.
वरिष्ठ पोलिस निरीक्षक डॉ. अमरनाथ वाघमोडे यांच्या मार्गदर्शनाखाली गुन्हे प्रकटीकरण शाखेचे निरीक्षक मारुती आंधळे आणि त्यांचे पथक पुढील तपास करत आहे.
