पुणे प्रतिनिधी
पुण्यातील शनिवारवाडा परिसरात केंद्रीय मंत्री नितीन गडकरी यांच्या दौर्‍यादरम्यान एका महिला पोलीस अधिकार्‍याशी अश्लील वर्तन केल्याप्रकरणी भाजपचे शहर महामंत्री प्रमोद कोंढरे यांच्याविरुद्ध फरासखाना पोलीस ठाण्यात विनयभंगाचा गुन्हा दाखल करण्यात आला आहे. हा प्रकार मंगळवारी सकाळी साडेदहा वाजण्याच्या सुमारास घडल्याचे समजते.
केंद्रीय मंत्री नितीन गडकरी हे सकाळी साडेनऊच्या सुमारास शनिवारवाडा येथे सुरू असलेल्या भुयारी मार्ग प्रकल्पाची पाहणी करण्यासाठी आले होते. त्यांच्यासोबत भाजपचे अनेक स्थानिक पदाधिकारीही उपस्थित होते. दरम्यान, अचानक झालेल्या पावसामुळे हे सर्वजण जवळच असलेल्या ‘अभिनंदन कडक चहा’ या हॉटेलात थांबले.
या वेळी प्रमोद कोंढरे यांनी संबंधित महिला पोलीस अधिकारी यांच्या पाठीमागे उभे राहत अत्यंत अशोभनीय आणि स्त्रीच्या मनास लज्जा उत्पन्न होईल, असे वर्तन केल्याचा आरोप आहे. संबंधित महिला अधिकार्‍यांनी या घटनेबाबत फरासखाना पोलीस ठाण्यात तक्रार दाखल केली आहे.
या प्रकरणामुळे पुणे शहरात राजकीय वर्तुळात खळबळ उडाली आहे. कोंढरे यांनी पत्रकाद्वारे या घटनेबाबत स्पष्टीकरण देताना, “हा प्रकार केवळ गैरसमजुतीमुळे घडला आहे. मी कोणत्याही महिला अधिकाऱ्याशी गैरवर्तन केलेले नाही,” असा दावा केला. तसेच त्यांनी या प्रकरणी पोलीस ठाण्यात लेखी निवेदनही दिले आहे.
पूर्वीही होते आरोप
कोंढरे यांच्यावर यापूर्वीही काही गुन्हे दाखल असल्याचे पोलीस सूत्रांनी सांगितले. मात्र, सध्या पोलिसांकडून अधिकृत माहिती देण्याचे टाळण्यात येत आहे. या प्रकरणाचा तपास वरिष्ठ पोलीस निरीक्षक प्रशांत भस्मे करत आहेत.
भविष्यातील कारवाईकडे लक्ष
या प्रकारामुळे भाजपमध्येही अंतर्गत हालचालींना वेग आला आहे. पक्षाकडून यावर काय भूमिका घेतली जाते आणि पोलिसांची पुढील कारवाई काय राहते, याकडे सर्वांचे लक्ष लागले आहे.
