मुंबई प्रतिनिधी
मुंबई : मॉन्सूनच्या परतीचा प्रवास सुरू झाल्यानंतर राज्यात उन्हाचा चटका पुन्हा वाढू लागला आहे. गेल्या काही दिवसांपासून बहुतांश भागांत कमाल तापमान सरासरीपेक्षा अधिक नोंदविले जात असून, ऑक्टोबरच्या सुरुवातीलाच नागरिकांना उकाड्याचा सामना करावा लागत आहे. पुढील काही दिवसांत राज्याच्या उत्तर भागात कमाल तापमानात आणखी २ ते ३ अंश सेल्सिअसने वाढ होण्याची शक्यता हवामान विभागाने वर्तवली आहे. विशेषतः ८ ते ११ ऑक्टोबरदरम्यान राज्याच्या अंतर्गत भागात कमाल तापमान ३७ ते ३९ अंश सेल्सिअसपर्यंत पोहोचण्याचा अंदाज आहे.
दरम्यान, राज्यातून मॉन्सूनच्या परतीला सुरुवात झाली असून, पुढील दोन ते तीन दिवसांत संपूर्ण महाराष्ट्रातून मॉन्सून माघारी जाण्याची शक्यता आहे. त्यामुळे एका बाजूला पावसाळ्याची अखेर होत असताना दुसरीकडे राज्यातील अनेक भागांत उन्हाचा कडाका वाढण्याची चिन्हे आहेत.
कोकणात उष्ण-दमट वातावरणाचा तडाखा
कोकणात गेल्या तीन-चार दिवसांपासून उष्ण आणि दमट हवामानामुळे उकाड्यात मोठी वाढ झाली होती. रत्नागिरी येथे ३८ अंश सेल्सिअस, तर मुंबईतील कुलाबा येथे ३७.४ अंश सेल्सिअस कमाल तापमानाची नोंद झाली. मात्र, सोमवारी कोकणातील कमाल तापमानात काहीशी घट झाली असून बहुतांश भागांत तापमान ३२ ते ३४ अंशांच्या आसपास नोंदविले गेले.
मध्य महाराष्ट्र आणि मराठवाड्यातही तापमानाचा पारा चढलेला आहे. जळगाव येथे ३७.५ अंश, तर मालेगाव येथे तब्बल ३८.४ अंश सेल्सिअस कमाल तापमानाची नोंद झाली. मालेगावचे तापमान सरासरी कमाल तापमानापेक्षा तब्बल ५.९ अंशांनी अधिक होते. सोलापूर येथे ३७.४ अंश, परभणी ३५.७ अंश, तर सातारा येथे ३५.१ अंश सेल्सिअस तापमानाची नोंद झाली.
पुढील दिवसांत उन्हाची तीव्रता वाढणार
हवामान विभागाच्या अंदाजानुसार राज्याच्या उत्तरेकडील भागात पुढील काही दिवसांत तापमानात २ ते ३ अंशांची वाढ होऊ शकते. राज्याच्या अंतर्गत भागात ८ ते ११ ऑक्टोबरदरम्यान कमाल तापमान ३७ ते ३९ अंशांच्या आसपास राहण्याची शक्यता आहे. त्यामुळे नागरिकांना विशेषतः दुपारच्या वेळेत उन्हाचा तडाखा अधिक जाणवण्याची शक्यता आहे.
काही भागांत पावसाच्या हलक्या सरी
एकीकडे तापमान वाढत असतानाच विदर्भातील काही भागांत ६ ते ९ ऑक्टोबरदरम्यान हलक्या ते मध्यम स्वरूपाच्या पावसाची शक्यता आहे. काही ठिकाणी वादळी पावसाचाही अंदाज वर्तविण्यात आला आहे. गडचिरोली जिल्ह्याला मंगळवार आणि बुधवारी पावसाचा यलो अलर्ट देण्यात आला आहे.
तसेच रायगड आणि रत्नागिरी जिल्ह्यांत मंगळवारी उष्ण व दमट वातावरण राहण्याची शक्यता असून, दुपारनंतर किंवा संध्याकाळच्या सुमारास गडगडाटासह पावसाच्या सरी कोसळू शकतात. सिंधुदुर्ग, कोल्हापूर घाट विभाग आणि सातारा घाट परिसरातील काही भागांतही वादळी पावसाचा अंदाज असून, या भागांना यलो अलर्ट देण्यात आला आहे.
मुंबईत उकाडा कायम; हवामान कोरडे राहणार
मुंबईसह पालघर आणि ठाणे जिल्ह्यांत उकाडा कायम आहे. उष्ण आणि दमट हवामानामुळे मुंबईकरांना उन्हाच्या झळा सहन कराव्या लागत आहेत. मात्र, उत्तर कोकणातील कमाल तापमानात सोमवारी काहीशी घट झाली. रायगड वगळता उत्तर कोकणातील बहुतांश भागांत मंगळवारपासून हवामान कोरडे राहण्याची शक्यता हवामान विभागाने व्यक्त केली आहे.
मुंबई शहर आणि उपनगरांत कमाल तापमान ३६ अंश सेल्सिअस, तर किमान तापमान २५ अंश सेल्सिअस राहण्याचा अंदाज आहे. त्यामुळे पुढील काही दिवसांत मुंबईसह राज्यातील नागरिकांना पावसाच्या निरोपासोबतच वाढत्या उकाड्याचाही सामना करावा लागणार आहे.
