मुंबई प्रतिनिधी
शिवसेनेतील राजकीय घडामोडींमुळे चर्चेत आलेले खासदार संजय दिना पाटील यांचे पत्रकारांशी झालेले वादग्रस्त वर्तन आता राज्याच्या विधिमंडळापर्यंत पोहोचले आहे. पत्रकारांना शिवीगाळ करत धमकी दिल्याचा आरोप झाल्यानंतर या प्रकरणाचे तीव्र पडसाद गुरुवारी विधानसभेत उमटले. काँग्रेसचे ज्येष्ठ नेते आणि आमदार नाना पटोले यांनी हा मुद्दा उपस्थित करत राज्यातील पत्रकारांच्या सुरक्षेचा प्रश्न ऐरणीवर आणला.
लोकसभा निवडणुकीत शिवसेना (उद्धव बाळासाहेब ठाकरे) पक्षाकडून निवडून आलेले संजय दिना पाटील यांनी नुकतेच अन्य पाच खासदारांसह एकनाथ शिंदे यांच्या नेतृत्वाखालील शिवसेनेत प्रवेश केला. त्यांच्या या राजकीय निर्णयानंतर ठाकरे गट आणि शिंदे गट यांच्यातील आरोप-प्रत्यारोप अधिक तीव्र झाले आहेत. याच पार्श्वभूमीवर संजय दिना पाटील यांच्या काही वक्तव्यांनी गेल्या काही दिवसांत वाद निर्माण केला होता.
काही दिवसांपूर्वी ठाकरे गटावर टीका करताना संजय दिना पाटील यांनी केलेल्या आक्रमक वक्तव्याची राज्यभर चर्चा झाली होती. “माझ्या वाट्याला येणाऱ्यांना मी हॉस्पिटलमध्ये किंवा स्मशानात पाठवेन” तसेच “आमच्या घराण्यात पाच लोकांचे खून झाले आहेत” अशा आशयाचे वक्तव्य त्यांनी केल्याचा आरोप झाला होता. या विधानांवरून ठाकरे गटाचे खासदार संजय राऊत यांनी मुंबई पोलीस आयुक्तांकडे तक्रार करत कारवाईची मागणी केली होती.
याच संदर्भात प्रतिक्रिया जाणून घेण्यासाठी गुरुवारी काही पत्रकार संजय दिना पाटील यांच्या निवासस्थानी पोहोचले होते. सुरुवातीला विविध राजकीय विषयांवर त्यांनी माध्यमांशी संवाद साधला. मात्र, त्यांच्या कन्या आणि ठाकरे गटाच्या नगरसेविका राजुल पाटील यांच्याबाबत प्रश्न विचारण्यात आल्यानंतर वातावरण अचानक तापले.
प्रश्न विचारताच संतापाचा उद्रेक
प्रश्नांची मालिका सुरू असताना संजय दिना पाटील यांचा संयम सुटल्याचे दिसून आले. पत्रकारांना उद्देशून त्यांनी आक्रमक भाषा वापरत संताप व्यक्त केला. “माझ्या नादाला लागू नका”, “अती करताय” अशा शब्दांत त्यांनी नाराजी व्यक्त केली. त्यानंतर त्यांनी माध्यम प्रतिनिधींना उद्देशून शिवीगाळ केल्याचा आणि धमकीवजा भाषा वापरल्याचा आरोप आहे.
घटनेचा व्हिडीओ सामाजिक माध्यमांवर व्हायरल झाल्यानंतर पत्रकार संघटना आणि विविध राजकीय पक्षांकडून तीव्र प्रतिक्रिया उमटू लागल्या. लोकशाहीच्या चौथ्या स्तंभाला धमकावण्याचा प्रयत्न असल्याचा आरोप विरोधकांनी केला.
विधानसभेत नाना पटोलेंचा संतप्त सवाल
या घटनेचे पडसाद गुरुवारी विधानसभेत उमटले. काँग्रेसचे आमदार नाना पटोले यांनी सभागृहात हा मुद्दा उपस्थित करत सरकारकडे तातडीने भूमिका स्पष्ट करण्याची मागणी केली.
“खासदार संजय दिना पाटील यांनी पत्रकारांना मारण्याची धमकी दिली आहे. हा केवळ एका व्यक्तीचा प्रश्न नाही. पत्रकार जर माहिती गोळा करायला गेले, एखादी बातमी दाखवली किंवा प्रश्न विचारला तर त्यांच्यावर हल्ले होणार असतील, तर महाराष्ट्रात नेमके काय सुरू आहे? राज्यातील पत्रकारही सुरक्षित नाहीत का?” असा सवाल पटोलेंनी उपस्थित केला.
पत्रकारांवरील वाढते हल्ले आणि दबावाचे प्रकार चिंताजनक असल्याचे नमूद करत त्यांनी या प्रकरणाची शासनाने गंभीर दखल घ्यावी, दोषींवर कारवाई करावी आणि सभागृहात निवेदन सादर करावे, अशी मागणी केली.
पत्रकार संघटनांमध्ये नाराजी
या घटनेनंतर पत्रकार संघटनांमध्येही तीव्र नाराजी व्यक्त होत आहे. लोकशाही व्यवस्थेत जनप्रतिनिधींना प्रश्न विचारणे हा पत्रकारांचा अधिकार असून त्याला धमकी आणि शिवीगाळीने उत्तर देणे अयोग्य असल्याचे मत अनेकांनी व्यक्त केले. पत्रकारांच्या सुरक्षिततेचा प्रश्न पुन्हा एकदा चर्चेत आला आहे.
राजकीय वातावरण तापले
संजय दिना पाटील यांच्या पक्षांतरानंतर आधीच शिवसेनेतील दोन्ही गटांमध्ये संघर्षाची परिस्थिती निर्माण झाली आहे. अशातच त्यांच्या वादग्रस्त वक्तव्यांमुळे राजकीय वातावरण आणखी तापले आहे. विरोधी पक्षांनी या प्रकरणावरून सत्ताधारी पक्षाला लक्ष्य केले असून लोकप्रतिनिधींनी सार्वजनिक जीवनातील सभ्यता आणि जबाबदारी जपावी, अशी मागणी जोर धरत आहे.
दरम्यान, या प्रकरणावर सरकारकडून आणि संबंधित यंत्रणांकडून कोणती भूमिका घेतली जाते, तसेच पत्रकारांना दिलेल्या कथित धमकीबाबत पुढे काय कारवाई होते, याकडे संपूर्ण राज्याचे लक्ष लागले आहे.
