मुंबई प्रतिनिधी
शिवसेनेच्या ६० व्या वर्धापन दिनाच्या पार्श्वभूमीवर राज्यातील राजकारण पुन्हा एकदा ढवळून निघाले आहे. ठाकरे गटातील सहा खासदारांच्या संभाव्य बंडखोरीच्या चर्चांनी आधीच राजकीय वर्तुळात खळबळ उडवून दिली असताना, गुरुवारी मुंबईतील विविध भागांमध्ये ठाकरे गटाकडून लावण्यात आलेल्या आक्रमक आशयाच्या बॅनर्समुळे वातावरण आणखी तापले आहे. “गद्दार बदलले, चेहरे बदलले; पण विचार नाहीत” अशा शब्दांत करण्यात आलेल्या या टीकेमुळे शिवसेनेतील अंतर्गत संघर्ष पुन्हा एकदा ऐरणीवर आला आहे.
शिवसेना पक्षप्रमुख उद्धव ठाकरे यांच्या नेतृत्वाखालील शिवसेना (उद्धव बाळासाहेब ठाकरे) पक्षाचा वर्धापन दिनाचा मुख्य कार्यक्रम सायन येथील षण्मुखानंद सभागृहात आयोजित करण्यात आला आहे. दुसरीकडे, उपमुख्यमंत्री एकनाथ शिंदे यांच्या नेतृत्वाखालील शिवसेनेचा मेळावा गोरेगाव येथील नेस्को संकुलात होत आहे. दोन्ही गटांकडून शक्तिप्रदर्शनाची तयारी सुरू असून, संभाव्य राजकीय घडामोडींमुळे राज्याचे लक्ष या सभांकडे लागले आहे.
मुंबईत ठिकठिकाणी आक्रमक बॅनर्स
वर्धापन दिनाच्या पूर्वसंध्येला मुंबईतील प्रमुख चौक, रस्ते आणि शिवसेना प्रभाव असलेल्या भागांमध्ये ठाकरे गटाकडून मोठ्या प्रमाणावर बॅनर्स झळकले. या बॅनर्समधून थेट नाव न घेता पक्ष सोडणाऱ्या किंवा बंडखोरीच्या मार्गावर असल्याची चर्चा असलेल्या नेत्यांवर निशाणा साधण्यात आला.
“गद्दार बदलले, चेहरे बदलले; पण विचार नाहीत” हा संदेश देत शिवसेनेच्या इतिहासातील विविध फुटींचा संदर्भ अधोरेखित करण्याचा प्रयत्न करण्यात आला आहे. पक्षनिष्ठा, विचारधारा आणि बाळासाहेब ठाकरे यांच्या वारशाचा मुद्दा पुढे करत ठाकरे गटाने आपल्या कार्यकर्त्यांना भावनिक संदेश देण्याचा प्रयत्न केल्याचे दिसून येत आहे.
याशिवाय काही बॅनर्सवर शिवसेनाप्रमुख बाळासाहेब ठाकरे, उद्धव ठाकरे आणि युवा नेते आदित्य ठाकरे यांची छायाचित्रे झळकविण्यात आली आहेत. त्यावर “जळलो, झुंजलो, उभे राहिलो… विश्वासघाताच्या राखेतून पुन्हा उभी राहण्याची जिद्द; हाच शिवसेनेचा इतिहास” असा मजकूर लिहिण्यात आला आहे. पक्षाने गेल्या सहा दशकांतील संघर्षमय वाटचालीचा उल्लेख करत कार्यकर्त्यांमध्ये आत्मविश्वास निर्माण करण्याचा प्रयत्न केल्याचे राजकीय निरीक्षकांचे मत आहे.
सहा खासदारांच्या चर्चेमुळे राजकीय खळबळ
गेल्या काही दिवसांपासून ठाकरे गटातील सहा खासदार शिंदे गटाच्या संपर्कात असल्याच्या चर्चांनी जोर धरला आहे. या खासदारांकडून स्वतंत्र भूमिका घेतली जाऊ शकते, अशी शक्यता व्यक्त केली जात असून त्याबाबत अधिकृत घोषणा अद्याप झालेली नाही. मात्र या चर्चांमुळे ठाकरे गटातील अस्वस्थता वाढल्याचे चित्र दिसत आहे.
याच पार्श्वभूमीवर आजच्या वर्धापन दिनाच्या कार्यक्रमात उद्धव ठाकरे आपल्या भाषणातून कोणती भूमिका मांडतात, संभाव्य बंडखोरांवर थेट टीका करतात का, तसेच आगामी राजकीय रणनीतीबाबत कोणते संकेत देतात, याकडे पक्षाच्या कार्यकर्त्यांसह राज्याच्या राजकीय वर्तुळाचे लक्ष लागले आहे.
दुसरीकडे, शिंदे गटाच्या नेस्को येथील मेळाव्यातही मोठ्या घोषणा होण्याची शक्यता व्यक्त केली जात आहे. विशेषतः चर्चेत असलेले खासदार या मंचावर उपस्थित राहतात का, याबाबत उत्सुकता वाढली आहे.
दोन्ही सभांच्या पार्श्वभूमीवर मुंबई पोलिसांचा हाय अलर्ट
शिवसेनेच्या दोन्ही गटांचे मोठे कार्यक्रम एकाच दिवशी होत असल्याने मुंबई पोलिसांनी विशेष खबरदारी घेतली आहे. संभाव्य निदर्शने, घोषणाबाजी, शक्तिप्रदर्शन किंवा कार्यकर्त्यांमधील संघर्ष टाळण्यासाठी शहरभर अतिरिक्त पोलीस बंदोबस्त तैनात करण्यात आला आहे.
मुंबई पोलीस मुख्यालयाकडून सर्व विभागीय पोलीस उपायुक्तांना सतर्क राहण्याच्या सूचना देण्यात आल्या आहेत. गोरेगावमधील नेस्को संकुल आणि सायनमधील षण्मुखानंद सभागृह परिसरात विशेष सुरक्षा व्यवस्था करण्यात आली आहे. याशिवाय संवेदनशील भागांमध्ये गस्त वाढविण्यात आली असून परिस्थितीवर वरिष्ठ अधिकारी स्वतः लक्ष ठेवून आहेत.
पोलिसांच्या माहितीनुसार, दोन्ही गटांच्या समर्थकांकडून मोठ्या प्रमाणावर उपस्थिती अपेक्षित असल्याने वाहतूक व्यवस्थापन, गर्दी नियंत्रण आणि कायदा-सुव्यवस्था राखण्यासाठी स्वतंत्र नियोजन करण्यात आले आहे.
आजच्या भाषणांकडे महाराष्ट्राचे लक्ष
शिवसेनेच्या इतिहासातील सर्वाधिक निर्णायक वर्धापन दिनांपैकी एक मानल्या जाणाऱ्या या दिवसात दोन्ही गटांकडून राजकीय ताकद दाखविण्याचा प्रयत्न होणार आहे. एका बाजूला पक्षनिष्ठा आणि विचारांचा मुद्दा पुढे करत ठाकरे गट आपले अस्तित्व अधोरेखित करण्याचा प्रयत्न करीत आहे, तर दुसऱ्या बाजूला संघटनात्मक विस्तार आणि वाढती राजकीय ताकद दाखविण्याचा शिंदे गटाचा प्रयत्न असेल.
यामुळे उद्धव ठाकरे आणि एकनाथ शिंदे यांच्या भाषणांतून पुढील राजकीय दिशा स्पष्ट होण्याची शक्यता असून, चर्चेत असलेल्या सहा खासदारांच्या भूमिकेबाबतही आजच्या घडामोडींमधून महत्त्वाचे संकेत मिळू शकतात. त्यामुळे शिवसेनेच्या दोन्ही गटांच्या सभांकडे संपूर्ण महाराष्ट्राचे लक्ष लागले आहे.
