पुणे प्रतिनिधी
पुण्यातून एक हृदयाला भिडणारी घटना समोर आली आहे. शिक्षिका आणि विद्यार्थ्यांच्या नात्याला उजाळा देणारी ही कहाणी सध्या समाजमाध्यमांवर चांगलीच चर्चेत आहे. हडपसरमधील साधना प्राथमिक विद्यालय येथे तिसरीत शिकणाऱ्या हमीद सुयोग बेंद्रे या नऊ वर्षांच्या विद्यार्थ्याने आपल्या वर्गशिक्षिका शारदा दवडे यांच्या बदलीविरोधात थेट शरद पवार यांना पत्र लिहिलं आहे. या निरागस विद्यार्थ्याच्या पत्रातील शब्द इतके भावनिक आहेत की, ते वाचून अनेकांच्या डोळ्यांत पाणी आलं.
“ताई खूप छान शिकवतात… मला रडू आलं!”
हमीदने आपल्या पत्रात लिहिलं आहे, “शारदा ताई खूप छान शिकवतात. त्या कधी ओरडत नाहीत. आम्हाला छान गोष्टी सांगतात, समजावून सांगतात. आम्ही सगळे ताईंना खूप मिस करतो. मला त्यांच्या बदलीचं कळल्यावर खूप रडू आलं…”
हे भावनिक पत्र हमीदने आपल्या पालकांच्या सांगण्यावरून लिहिलं असलं, तरी त्यातील भावना शंभर टक्के त्याच्या मनातील आहेत, असं स्पष्ट जाणवतं. हे पत्र सोशल मीडियावर व्हायरल झालं असून, अनेकांनी त्यावर प्रतिक्रियांचा वर्षाव केला आहे.
विद्यार्थ्यांचा लाडकी शिक्षिका, सहृदयी शिक्षणशैली
शारदा दवडे या शाळेतील विद्यार्थ्यांमध्ये अत्यंत लोकप्रिय आहेत. त्यांनी घेतलेल्या वर्गांमध्ये फक्त पुस्तकं शिकवली जात नाहीत, तर प्रेम, संवाद आणि समजूतदारपणा यांचा मिलाफ असतो, असं शाळेतील इतर शिक्षक आणि पालक सांगतात. त्यामुळे त्यांची अचानक बदली ही विद्यार्थ्यांसाठी मोठा धक्का ठरली आहे.
प्रशासनाकडे भावनांची दखल घेण्याची मागणी
हमीदचं पत्र सध्या शासनदरबारी पोहोचण्याच्या मार्गावर असून, संबंधित प्रशासनाने याची दखल घ्यावी, अशी मागणी पालक आणि नागरिकांकडून होत आहे. “शिक्षकांच्या बदल्या करताना विद्यार्थ्यांच्या भावनाही समजून घ्या,” असा सूर सोशल मीडियावरील चर्चेतून उमटत आहे.
शिक्षक-विद्यार्थी नात्याचं हे हळवं चित्र…
या घटनेमुळे पुन्हा एकदा शिक्षक-विद्यार्थी नात्याचं कोमल आणि भावनिक रूप समोर आलं आहे. हमीदचं पत्र केवळ एका तिसरीच्या विद्यार्थ्याचं रडवेलं गाऱ्हाणं नाही, तर शिक्षणव्यवस्थेतील मानवी स्पर्शाची आठवण करून देणारं सत्य आहे.
शारदा दवडे यांची बदली पुन्हा विचाराधीन घेण्यात येणार का? विद्यार्थ्यांची ही भावनिक हाक शासकीय यंत्रणांपर्यंत पोहोचेल का? याची उत्तरं लवकरच मिळतील, अशी अपेक्षा आहे.
