धाराशिव प्रतिनिधी
दिवाळीचा सण आनंदात साजरा होत असतानाच धाराशिव जिल्ह्यातील येडशी गावात काळीज पिळवटून टाकणारी दुर्घटना घडली आहे. किराणा दुकानाला लागलेल्या भीषण आगीत दुकानाच्या वरच्या मजल्यावर वास्तव्यास असलेल्या करंडे कुटुंबातील सहा जणांचा दुर्दैवी मृत्यू झाला. मध्यरात्रीच्या सुमारास लागलेल्या आगीने काही क्षणांतच रौद्ररूप धारण केले. धुराचे प्रचंड लोट आणि आगीच्या ज्वाळांमुळे घरातील सदस्यांना बाहेर पडण्याची संधीच मिळाली नाही. श्वास कोंडल्याने सहाही जणांचा मृत्यू झाल्याची प्राथमिक माहिती आहे. या दुर्घटनेत एक व्यक्ती बचावल्याचे वृत्त आहे. ऐन सणासुदीच्या काळात एकाच कुटुंबातील सहा जणांचा मृत्यू झाल्याने येडशी गावावर शोककळा पसरली असून संपूर्ण परिसर सुन्न झाला आहे.
मध्यरात्री अडीचच्या सुमारास काळाचा घाला!
मिळालेल्या माहितीनुसार, येडशी येथील गोविंद करंडे यांचे किराणा अँड जनरल स्टोअर्स नावाचे दुकान आहे. या दुकानाच्या वरच्या मजल्यावर करंडे कुटुंब वास्तव्यास होते. रविवारी मध्यरात्री साधारण अडीचच्या सुमारास अचानक दुकान आणि घराच्या परिसरात आग लागली. काही क्षणांतच आगीने भीषण स्वरूप धारण केले. दुकानातील किराणा साहित्य आणि इतर वस्तूंमुळे आग वेगाने पसरल्याची प्राथमिक माहिती आहे.
घरातील सदस्य गाढ झोपेत असतानाच ही दुर्घटना घडल्याने त्यांना परिस्थितीचे गांभीर्य लक्षात येईपर्यंत आग आणि धुराने संपूर्ण परिसर व्यापला होता. बाहेर पडण्याचे मार्ग आगीच्या विळख्यात सापडल्याने कुटुंबातील सदस्य घरातच अडकले. धुरामुळे श्वास घेणेही अशक्य झाले आणि सहा जणांचा दुर्दैवी अंत झाला.
करंडे कुटुंबातील सहा जणांचा मृत्यू
या भीषण दुर्घटनेत मृत्युमुखी पडलेल्यांमध्ये उत्तम त्रिंबक करंडे (वय ७५), चंद्रकला उत्तम करंडे (७०), गोविंद उत्तम करंडे (४७), ज्योती गोविंद करंडे (४२), गायत्री गोविंद करंडे (१६) आणि सिद्धी गोविंद करंडे (१५) यांचा समावेश आहे.
एकाच घरातील तीन पिढ्यांतील सहा जणांचा अशा प्रकारे अंत झाल्याने गावकऱ्यांना मोठा धक्का बसला आहे. मृतदेह धाराशिव येथील शासकीय रुग्णालयात शवविच्छेदनासाठी नेण्यात आले आहेत. दुर्घटनेतून एक व्यक्ती बचावल्याची प्राथमिक माहिती समोर आली आहे.
आमदार राणा जगजितसिंह पाटील पहाटेच घटनास्थळी
दुर्घटनेची माहिती मिळताच स्थानिक नागरिकांनी घटनास्थळी धाव घेतली. आग विझविण्यासाठी आणि घरात अडकलेल्या व्यक्तींना बाहेर काढण्यासाठी गावकऱ्यांनी शर्थीचे प्रयत्न केले. कळंब आणि तुळजापूर येथील अग्निशमन दलाच्या गाड्यांनाही पाचारण करण्यात आले. आमदार राणा जगजितसिंह पाटील यांनी पहाटे ४.२० वाजण्याच्या सुमारास घटनास्थळी भेट दिल्याची माहिती आहे. मात्र, आगीची तीव्रता आणि धुराचे प्रचंड लोट यामुळे बचावकार्यात अडथळे निर्माण झाले.
गावकऱ्यांचे शर्थीचे प्रयत्न; जेसीबीने भिंती फोडल्या!
या घटनेनंतर स्थानिक नागरिकांनी केलेल्या प्रयत्नांची माहितीही समोर आली आहे. आगीची भीषणता इतकी होती की घरात अडकलेल्या लोकांना बाहेर काढणे अत्यंत कठीण झाले होते. काही गावकऱ्यांनी जेसीबीच्या साहाय्याने भिंती फोडल्या, दरवाजे तोडले आणि घरात प्रवेश करण्याचा प्रयत्न केला. परिसरातील बोअरवेल सुरू करून बादल्यांनी पाणी टाकण्यात आले. मात्र, आगीचे रौद्ररूप आणि धुराचे लोट यांच्यापुढे गावकऱ्यांचे प्रयत्न अपुरे पडले.
अग्निशमन दल घटनास्थळी पोहोचल्यानंतरही धुरामुळे बचावकार्यात अडथळे आल्याचे स्थानिकांनी सांगितले. अग्निशमन दलाच्या कर्मचाऱ्यांकडे आवश्यक ऑक्सिजन मास्क उपलब्ध नसल्याने सुरुवातीला घरात प्रवेश करणे कठीण झाल्याचा आरोपही काही स्थानिकांनी केला आहे. मात्र, या आरोपांची अधिकृत पुष्टी अद्याप झालेली नाही.
‘बाकी सगळं जळालं असतं तरी चाललं असतं; पण माणसं वाचायला हवी होती!’
या दुर्घटनेनंतर गावकऱ्यांच्या भावना अनावर झाल्या आहेत. करंडे कुटुंबातील सदस्यांचा स्वभाव अत्यंत प्रेमळ आणि मनमिळाऊ होता. गावातील प्रत्येकाशी त्यांचे जिव्हाळ्याचे संबंध होते. त्यामुळे त्यांच्या मृत्यूची बातमी समजताच संपूर्ण गावावर दुःखाचा डोंगर कोसळला.
एका स्थानिक नागरिकाने भावनिक शब्दांत आपली प्रतिक्रिया व्यक्त केली. ते म्हणाले, “आम्ही आजूबाजूच्या परिसरातील बोअर सुरू केले. बादल्यांनी पाणी मारले. जेसीबीने भिंती फोडल्या. शक्य तेवढे प्रयत्न केले; पण आम्हाला यश आले नाही. देवाने त्यांना वाचवायला हवे होते. माणसांचे स्वभाव खूपच भारी होते. अगदी देवासारखी माणसं होती. बाकी सगळं जळालं असतं तरी चाललं असतं; पण माणसं वाचायला पाहिजे होती.”
या शब्दांतून गावकऱ्यांचे दुःख आणि हतबलता स्पष्टपणे जाणवते.
पणतीमुळे आग लागल्याचा प्राथमिक अंदाज; नेमके कारण गुलदस्त्यात
दिवाळीनिमित्त घरात लावलेल्या पणतीमुळे आग लागली असावी, असा प्राथमिक अंदाज व्यक्त केला जात आहे. मात्र, आग नेमकी कुठून आणि कशामुळे लागली, याबाबत अद्याप अधिकृत निष्कर्ष समोर आलेला नाही. पोलीस यंत्रणेकडून घटनास्थळाचा पंचनामा आणि पुढील तपास सुरू असल्याचे वृत्त आहे. आगीचे कारण निश्चित झाल्यानंतरच दुर्घटनेमागील नेमकी परिस्थिती स्पष्ट होणार आहे.
दिवाळीच्या दिव्यांखाली सहा आयुष्यांचा अंधार!
दिवाळी म्हणजे प्रकाशाचा, आनंदाचा आणि मांगल्याचा सण. घराघरांत पणत्यांची आरास, दिव्यांची रोषणाई आणि आनंदाचे वातावरण असताना येडशीतील करंडे कुटुंबावर मात्र काळाने घाला घातला. ज्या घरात दिवाळीचा आनंद साजरा होणार होता, त्याच घरातून सहा जणांच्या मृत्यूची दुर्दैवी बातमी बाहेर आली. एका क्षणात हसतेखेळते कुटुंब उद्ध्वस्त झाले. येडशी गावाच्या इतिहासातील ही अत्यंत भीषण दुर्घटना ठरली असून, करंडे कुटुंबाच्या आठवणी आता गावकऱ्यांच्या मनात कायमच्या घर करून राहणार आहेत.


