दुबई :
मैदानावर श्रीलंकेचा दणदणीत पराभव करून भारतीय महिला संघाने महिला टी-२० आशिया कपवर आठव्यांदा नाव कोरले; मात्र सामन्यानंतर मैदानाबाहेर पुन्हा एकदा ट्रॉफीवरून मोठा पेच निर्माण झाला. आशियाई क्रिकेट परिषदेचे (एसीसी) अध्यक्ष आणि पाकिस्तान क्रिकेट बोर्डाचे प्रमुख मोहसिन नक्वी यांच्या हस्ते विजेतेपदाची ट्रॉफी स्वीकारण्यास भारतीय महिला संघाने नकार दिल्याचे समोर आले आहे. त्यामुळे गेल्या वर्षी पुरुषांच्या आशिया कपच्या अंतिम सामन्यानंतर दुबईत घडलेल्या ट्रॉफी प्रकरणाचीच पुनरावृत्ती रविवारी महिला संघाच्या बाबतीत झाली.
दुबई आंतरराष्ट्रीय क्रिकेट स्टेडियमवर रविवारी भारत आणि श्रीलंका यांच्यात महिला आशिया कप २०२६ चा अंतिम सामना झाला. हरमनप्रीत कौरच्या नेतृत्वाखालील भारतीय संघाने सर्वच आघाड्यांवर वर्चस्व गाजवत श्रीलंकेचा तब्बल ७२ धावांनी पराभव केला. भारताने प्रथम फलंदाजी करताना २० षटकांत ५ बाद १८३ धावा केल्या. शफाली वर्माने ६८ धावांची आक्रमक खेळी केली, तर स्मृती मानधनाने ५९ धावा करत तिला उत्तम साथ दिली. दोघींनी पहिल्या विकेटसाठी तब्बल १२९ धावांची भागीदारी करत भारताच्या विजयाची पायाभरणी केली. शफालीने अवघ्या २४ चेंडूंत अर्धशतक झळकावत महिला आशिया कपमधील सर्वात वेगवान अर्धशतकाची नोंद केली.
भारताने उभारलेल्या १८४ धावांच्या आव्हानाचा पाठलाग करताना श्रीलंकेचा डाव २० षटकांत १११ धावांवर आटोपला. श्री चरणीने चार बळी घेत श्रीलंकेच्या फलंदाजीची कंबर मोडली, तर दीप्ती शर्मानेही प्रभावी गोलंदाजी करत तीन बळी टिपले. परिणामी भारताने तब्बल ७२ धावांनी विजय मिळवत विक्रमी आठवे महिला आशिया कप विजेतेपद पटकावले.
मात्र सामना संपल्यानंतर विजयाचा जल्लोष काही काळातच वेगळ्या चर्चेने झाकोळला. अंतिम सामना संपल्यानंतर नेहमीप्रमाणे लगेच पुरस्कार वितरण सोहळा सुरू झाला नाही. जवळपास ४० मिनिटांहून अधिक काळ प्रेझेंटेशनला विलंब झाला. या काळात भारतीय खेळाडू मैदानावर दिसत नव्हत्या. बीसीसीआयचे उपाध्यक्ष राजीव शुक्ला आणि सचिव देवजित सैकिया यांनी भारतीय खेळाडूंचे अभिनंदन केले. त्यानंतर पुरस्कार वितरणासाठी व्यासपीठावर मोहसिन नक्वी आणि एसीसीचे अन्य अधिकारी उपस्थित झाले.
प्रेझेंटेशन सुरू झाल्यानंतर प्रथम पंच आणि सामनाधिकाऱ्यांना पदके देण्यात आली. त्यानंतर उपविजेत्या श्रीलंकेच्या खेळाडूंना पदके देण्यात आली. श्रीलंकेची कर्णधार चमारी अटापट्टू हिला मोहसिन नक्वी यांच्या हस्ते उपविजेत्याचा धनादेशही देण्यात आला. मात्र त्यानंतर अपेक्षित असलेला विजेत्या भारतीय संघाचा पुरस्कार वितरण सोहळा झाला नाही. भारतीय खेळाडू व्यासपीठावरच आले नाहीत आणि विजेतेपदाची ट्रॉफीही स्वीकारण्यात आली नाही.
या संपूर्ण घडामोडीनंतर भारतीय संघाने नक्वी यांच्या हस्ते ट्रॉफी आणि पदके स्वीकारण्यास नकार दिल्याचे वृत्त समोर आले. काही वृत्तांनुसार, बीसीसीआयने या भूमिकेबाबत एसीसीला आधीच आपली भूमिका कळवली होती. पुरस्कार वितरणाच्या वेळी स्मृती मानधनाने नक्वी व्यासपीठावर असल्याचे पाहिल्यानंतर तेथून दूर जाण्याचा निर्णय घेतल्याचेही वृत्त आहे. मात्र या निर्णयामागील कारणाबाबत भारतीय संघाकडून अद्याप सविस्तर अधिकृत निवेदन आलेले नाही.
भारतीय महिला संघाचे मुख्य प्रशिक्षक अमोल मुझुमदार यांनी मात्र बीसीसीआयच्या भूमिकेला पाठिंबा दर्शवला. संघासाठी स्पर्धा संपली असून विजेतेपदाचा अभिमान असल्याचे त्यांनी सांगितले. त्यामुळे ट्रॉफी स्वीकारण्याच्या मुद्द्यावरून निर्माण झालेल्या वादापेक्षा संघाचे लक्ष पुढील आशियाई क्रीडा स्पर्धांकडे असल्याचे त्यांनी स्पष्ट केले.
गेल्या वर्षीही दुबईत अशीच परिस्थिती
विशेष म्हणजे, अगदी वर्षभरापूर्वी पुरुषांच्या आशिया कप २०२५ च्या अंतिम सामन्यानंतरही दुबईत अशीच परिस्थिती निर्माण झाली होती. पाकिस्तानचा पराभव करून भारतीय पुरुष संघाने आशिया कप जिंकला होता. मात्र एसीसी अध्यक्ष आणि पीसीबी प्रमुख मोहसिन नक्वी यांच्या हस्ते ट्रॉफी स्वीकारण्यास भारतीय संघाने नकार दिला होता. त्यावेळी पुरस्कार वितरण सोहळ्याला तब्बल तासभर विलंब झाला आणि अखेर भारतीय संघ ट्रॉफीशिवायच जल्लोष करताना दिसला.
त्या घटनेनंतर बीसीसीआयने ट्रॉफी आणि खेळाडूंची पदके भारताला परत देण्याची मागणी केली होती. त्यावरून एसीसीमध्येही वाद निर्माण झाला होता. भारतीय क्रिकेट मंडळाने ट्रॉफी आणि पदकांबाबत स्पष्टता मागितली होती. त्यामुळे गेल्या वर्षीचा वाद अद्याप पूर्णपणे विस्मरणात गेलेला नसतानाच यंदा महिला आशिया कपच्या अंतिम सामन्यात पुन्हा त्याच प्रकारची परिस्थिती निर्माण झाली आहे.
आठव्यांदा आशिया कप जिंकूनही भारतीय महिला संघाच्या हातात विजेतेपदाची ट्रॉफी नाही. मैदानावर भारताने श्रीलंकेला एकतर्फी धक्का देत आपले वर्चस्व सिद्ध केले; पण मैदानाबाहेर भारत-पाकिस्तान क्रिकेट संबंधातील तणाव पुन्हा एकदा पुरस्कार वितरणाच्या मंचावर आला. त्यामुळे महिला आशिया कप २०२६ चा अंतिम सामना भारतीय क्रिकेटच्या इतिहासात केवळ विक्रमी विजयासाठी नव्हे, तर पुन्हा एकदा रंगलेल्या ‘ट्रॉफी ड्रामा’साठीही चर्चेत राहणार आहे.
