अहिल्यानगर प्रतिनिधी
शाळा म्हणजे विद्यार्थ्यांच्या जडणघडणीचे आणि संस्कारांचे केंद्र मानले जाते. शिक्षकांकडून विद्यार्थ्यांना प्रेमाने आणि शिस्तीने घडविले जावे, अशी अपेक्षा असते. मात्र, अहिल्यानगर शहराजवळील एका खासगी इंग्रजी माध्यमाच्या शाळेत याच अपेक्षांना धक्का देणारा धक्कादायक प्रकार समोर आला आहे. इयत्ता तिसरीत शिकणाऱ्या आठ वर्षीय विद्यार्थ्याचा हात चावल्याचा तसेच त्याचा गळा पकडून काही काळ हवेत उचलून धरल्याचा गंभीर आरोप शाळेच्या प्राचार्यांवर करण्यात आला आहे. या घटनेने पालकांमध्ये संतापाचे वातावरण निर्माण झाले आहे.
या प्रकरणी नगर तालुका पोलीस ठाण्यात शाळेचे प्राचार्य गौतम बहादुर्गे यांच्याविरुद्ध बाल न्याय (Juvenile Justice Act) अंतर्गत गुन्हा दाखल करण्यात आला आहे. विद्यार्थ्याचे वडील सोनल शेळके यांनी दिलेल्या फिर्यादीवरून पोलिसांनी ही कारवाई केली असून, घटनेचा पुढील तपास सुरू आहे.
वर्गातील भांडणाची माहिती दिल्याने प्रकार घडल्याचा आरोप
फिर्यादीनुसार, संबंधित शाळेतील तिसरीच्या वर्गात काही विद्यार्थ्यांमध्ये भांडण सुरू होते. त्यावेळी आठ वर्षीय विद्यार्थ्याने वर्गशिक्षिका ज्योती मॅडम यांच्या निदर्शनास ही बाब आणून दिली. त्यानंतर वर्गशिक्षिकांनी प्राचार्य गौतम बहादुर्गे यांना वर्गात बोलावले.
प्राचार्य वर्गात आल्यानंतर त्यांनी भांडण करणाऱ्या विद्यार्थ्यांचे कान पिळल्याचे तक्रारीत नमूद करण्यात आले आहे. त्यानंतर तक्रार करणाऱ्या विद्यार्थ्याकडे वळून, ‘भांडण कसे करतात ते दाखवतो,’ असे म्हणत त्याचा गळा पकडून हवेत उचलल्याचा आरोप करण्यात आला आहे.
सुमारे वीस सेकंद हवेत धरल्याचा दावा
विद्यार्थ्याच्या वडिलांनी दिलेल्या तक्रारीनुसार, प्राचार्यांनी मुलाचा गळा पकडून त्याला हवेत उचलले आणि एक ते वीसपर्यंत आकडे मोजत सुमारे वीस सेकंद त्याला हवेत धरून ठेवले. त्यानंतर खाली सोडताना त्याच्या हाताचा चावा घेतल्याचा गंभीर आरोपही करण्यात आला आहे.
या प्रकारामुळे घाबरलेल्या विद्यार्थ्याची प्रकृती आणि मानसिक अवस्था पाहून कुटुंबीयांना घटनेची कल्पना आली. मुलाच्या हातावर जखम आढळून आल्यानंतर पालकांनी त्याला उपचारासाठी रुग्णालयात दाखल केले.
‘माझ्याकडून चुकून घटना घडली, लेखी माफी मागतो’
घटनेनंतर विद्यार्थ्याच्या पालकांनी प्राचार्यांशी दूरध्वनीवरून संपर्क साधला. त्यावेळी ‘माझ्याकडून चुकून ही घटना घडली. मी लेखी माफी मागतो,’ असे प्राचार्यांनी सांगितल्याचा दावा पालकांनी केला आहे.
मात्र, आठ वर्षांच्या चिमुकल्या विद्यार्थ्याशी अशा प्रकारे शारीरिक वर्तन झाल्याने पालक संतप्त झाले आहेत. शाळेत शिस्त लावण्याच्या नावाखाली विद्यार्थ्यांवर शारीरिक अत्याचार होणे कोणत्याही परिस्थितीत योग्य नसल्याचे पालकांचे म्हणणे आहे.
कठोर कारवाईची पालकांची मागणी
या घटनेमुळे संबंधित विद्यार्थ्याच्या कुटुंबीयांमध्ये भीतीचे वातावरण निर्माण झाले आहे. मुलाच्या मनावर या घटनेचा विपरीत परिणाम होऊ नये, याचीही पालकांना चिंता आहे. विद्यार्थ्याशी अशा प्रकारे गैरवर्तन करणाऱ्या संबंधित प्राचार्यांवर कठोरात कठोर कारवाई करावी आणि कायद्यानुसार जास्तीत जास्त शिक्षा व्हावी, अशी मागणी विद्यार्थ्याचे वडील सोनल शेळके यांनी केली आहे.
दरम्यान, पोलिसांनी या प्रकरणी बाल न्याय कायद्यान्वये गुन्हा दाखल केला असून घटनेचा सविस्तर तपास सुरू आहे. शाळेतील इतर विद्यार्थी, शिक्षक तसेच संबंधित व्यक्तींची चौकशी करण्यात येण्याची शक्यता आहे. पोलिस तपासातून या घटनेमागील नेमकी परिस्थिती आणि आरोपांची सत्यता स्पष्ट होणार आहे.
चिमुकल्या विद्यार्थ्यांवर शारीरिक शिक्षा करण्यास कायद्याने मनाई असताना अशा प्रकारची घटना घडल्याने शाळांमधील विद्यार्थ्यांच्या सुरक्षिततेचा प्रश्न पुन्हा ऐरणीवर आला आहे.
